Sumatra adasında baş verən püskürmə nəticəsində kül sütunu minlərlə metr yüksəlib və əhaliyə təhlükə barədə xəbərdarlıq edilib...
İndoneziyanın Sumatra adasında yerləşən Marapi vulkanında püskürmə baş verib.
Poliqon xəbər verir ki, bu barədə ölkənin Antara xəbər agentliyi məlumat yayıb.
Məlumata görə, püskürmə nəticəsində vulkanın kraterindən qalxan kül sütunu təxminən 1,6 min metr yüksəkliyə qalxıb. Bu isə dəniz səviyyəsindən ümumilikdə 4 491 metr hündürlük deməkdir. Vulkan külü əsasən cənub-qərb istiqamətində yayılıb.
Yerli hakimiyyət orqanları vulkan ətrafında yaşayan əhalini mümkün təhlükələr barədə xəbərdar edib. Bildirilir ki, püskürmə nəticəsində lava axınlarının baş verməsi və yüksək temperaturda olan kül və qaz qarışığından ibarət isti buludların yaranması ehtimalı var.
Marapi dəniz səviyyəsindən 2 891 metr hündürlükdə yerləşən aktiv vulkandır. O, ölkənin qərbində yerləşən Barisan dağ silsiləsinin şimal-qərb hissəsində yerləşir və regionun ən aktiv vulkanlarından biri hesab olunur.
Xatırladaq ki, 2023-cü ilin dekabr ayında Marapi vulkanının püskürməsi nəticəsində ən azı 22 nəfər həyatını itirmişdi. Həmin hadisə regionda geniş miqyaslı xilasetmə və axtarış əməliyyatlarına səbəb olmuşdu.
İndoneziya dünyada ən böyük arxipelaq ölkələrindən biridir və təxminən 18 min adadan ibarətdir. Ölkə Sakit okeanın “Odlar halqası” adlanan seysmik fəal zonasında yerləşdiyi üçün burada tez-tez zəlzələlər və vulkan püskürmələri baş verir. Ümumilikdə İndoneziyada 500-dən çox vulkan mövcuddur və onların təxminən 130-u aktiv hesab olunur.
Poliqon.info
