Lent az portalından əldə olunan məlumata əsasən, ain.az xəbər verir.
CİNAYƏT İŞİ
Qısa arayış...
2022-ci il aprelin 4-də Bakının Nəsimi rayonunda qətl hadisəsi olur. Daxil olan məlumat əsasında hüquq-mühafizə orqanlarının əməkdaşları əraziyə yollanır. Məlum olur ki, hadisə Alı Mustafayev küçəsi, 29 ünvanında baş verib. Təcili Tibbi Yardım avtomobilində xərəkdə uzanmış kişi meyitinin döş qəfəsində bıçaq yaralarının olması müəyyən edilib. Axtarış zamanı meyitin üzərindən şəxsiyyət vəsiqəsi və mobil telefon aşkar edilib.Həmin gecə 1984-cü il təvəllüdlü Rabil Qasımov hadisə ilə bağlı şübhəli şəxs qismində saxlanılıb.Televiziya kanalları və informasiya portalları məlumat yayıblar ki, 1982-ci il təvəllüdlü Bəhruz Quliyev qumarda uduzduğu pulu qaytarmadığı üçün Rabil Qasımov onu öldürüb. Əslində isə bu xəbər öz təsdiqini tapmayıb.
Faktla bağlı Nəsimi rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.
Lent.az qətl hadisəsinin istintaq materiallarını əldə edib.İstintaqla müəyyən edilib ki, aprelin 4-də Alı Mustafayev küçəsi, 29 ünvanınında yerləşən kafedə Rabil Qasımov, Bəhruz Quliyev və Rəşad Qasımov tanışları Şükür Səfərovun ad gününü qeyd ediblər. Rabil orta dərəcəli sərxoş vəziyyətdə ordan çıxıb gedərkən aralarında yaranan mübahisə zamanı Bəhruz Quliyev onu təhqir edib və üzünə yumruqla zərbələr vurub. Dostuna fiziki cəhətdən gücü çatmadığını görən Rabil Qasımov qisas niyyəti ilə onu öldürmək qərarına gəlib. Bunun üçün o, yaxınlıqda saxlanılan idarə etdiyi “Hyundai” markalı avtomobildən bıçağı götürüb və Bəhruz Qulievə 3 dəfə zərbə endirib. Nəticədə B. Quliyev ölüb.
İş üzrə dindirilmiş Rabil Qasımov bildirib ki, 4-cü mikrorayonda, 20 Yanvar küçəsi, 29 ünvanında yaşayıb. Sakit təbiətli insan olsa da, pandemiya dövründə işsizlik və sıxıntıdan əsəbləri pozulub:
“Bəhruz Quliyevlə 19 nömrəli orta məktəbin yanında fəaliyyət göstərən kafedə tanış olmuşduq. Həmin obyekti icarə əsasında tanışım Rəşad Qasımov işlədirdi. Aprelin 4-ü saat 20 radələrində dostlarımla görüşmək üçün ora getdim. Mənim təşəbbüsümlə Bəhruz, Rəşad və Şükürlə birlikdə, Şükürün ad gününü qeyd etməkdən ötrü kafeyə gedib yeyib-içdik. Ordan çıxıb, söhbət edə-edə gedərkən Bəhruzla aramızda mübahisə yarandı. Belə ki, tanışım məndən borca götürdüyü 21 manat pulu gec qaytardığı üçün gileyləndim, Bəhruz isə cavab olaraq məni və ailəmi söydü. Bir-birimizin ünvanına nalayiq ifadələr işlədərək əlbəyaxa olduq. Bəhruz üzümə yumruqla güclü zərbələr vurdu. Onu qorxutmaq üçün sürdüyüm avtomobilə doğru qaçdım. Qapının saxlanc yerindən götürdüyüm açılıb-bağlanan bıçaqla ağır söyüşlər söyməkdə davam edən Bəhruza yaxınlaşdım.
Rabil Qasımov
Şükür Bəhruzu tutub kənara çəkməyə çalışsa da, o sakitləşmirdi. Bəhruzun döş qəfəsinə zərbə endirdim. Yaralanan tanışım tikilməkdə olan çoxmərtəbəli binanın sağ tərəfinə qaçdı. Onun arxasınca qaçdıq. Bəhruzun bir az irəlidə yıxılıb üzüstə uzanıqlı vəziyyətdə qaldığını gördük. Silkələyib onu çağırsam da, səsi çıxmırdı. Rəşad qışqıraraq Bəhruzu tez xəstəxanaya çatdıraq dedi. Amma mən evimə gəlib və atama adam adam bıçaqladığımı bildirdim. 5-10 dəqiqəyə qayıdacağımı söyləyərək yenidən evdən çıxdım. Taksiyə oturub, sürücüyə Novxanı qəsəbəsinə sürməsini dedim. Yolda olanda atam zəng edib polis əməkdaşlarının məni axtardığını xəbər verdi. Masazır qəsəbəsi yaxınlığında sürücüyə maşını saxlamasını dedim və bıçağı atdım. Yarım saatdan sonra yaşadığım ünvana çatanda, binanın həyətində polisləri gördüm”.
Şahid İlham Vəliyev bildirib ki, binanın yaxınlığından səs-küy eşidib. Orda Rəşad, Şükür, Rabil və Bəhruz adlı şəxslərin mübahisə etdiklərini görüb:
“Nalayiq ifadələrdən istifadə edilirdi. Rəşadla Şükür nalayiq ifadələr işlədən dalaşanları aralamağa çalışırdılar. Daha sonra hamısı Bəhruzun arxasınca qaçdı. Yaralanan şəxs müvazinətini itirərək yerə yıxıldı. Yaxınlaşanda, onun sinəsindən qan gəldiyini gördüm. Şükür 103 xidmətinə zəng etdi, amma Təcili tibbi yardım maşını gec gəldiyindən Bəhruzu tanımadığım şəxsin avtomobilinə qoyub xəstəxanaya apardılar. Yolda Təcili yardım maşını ilə rastlaşdıq. Müayinə edən həkimlər Bəhruzun öldüyünü bildirdilər”.
Şahid Emin Cabbarov bildirib ki, bir ildən artıqdır Rəşad Qasımovun işlətdiyi çay evində ofisiant işləyib:
“Aprelin 4-də axşam Bəhruz Quliyev çayxanaya gəlib 21 manat pul verərək məndən həmin məbləği borclu olduğu Rabil Qasımova çatdırmağımı xahiş etdi. Bir müddətdən sonra Rabil içəri daxil olaraq Rəşadgilin oturduğu masada əyləşdi. Yaxınlaşıb pulu Rabilə verdim. Daha sonra müştərilər çox olduğundan başım işə qarışdı. Səhərisi gün işə gələndə, Rabilin Bəhruzu öldürdüyünü bildim”.
Mərhumun telefonuna baxış keçirərkən, aprelin 1-də və 2-də Rabil Qasımovdan gələn zənglərə Bəhruz Quliyev tərəfindən cavab verilməməsi müəyyən edilib.Məhkəmə-psixiloji ekspertizasının rəyinə görə, Rabil Qasımov hərəkətlərinin faktiki xarakterini və ictimai təhlükəliliyini idarə etmək iqtidarında olub. O anlaqlı hesab edilib. Məhkəmə iclasında Rabil Qasımov ittiham üzrə özünü təqsirli bilib. Əməlindən peşman olduğunu qeyd edib.
Zərərçəkmiş şəxsin hüquqi varisi Laləzar Quliyeva ifadəsində göstərib ki, aprelin 5-nə keçən gecə qardaşıoğlu Elçin Həsənov onlara gələrək Bəhruzun öldürülməsi haqda məlumat verib. O, Rabil Qasımovla barışdığını və ona qarşı heç bir şikayəti olmadığını bildirib.
Məhkəmə mövcud hallara qiymət verərək Rabil Qasımovun CM-nin 120.1-ci (qəsdən adam öldürmə) maddəsində nəzərdə tutulmuş cinayət əməlini törətməsini, bununla da onun təqsirliliyini tam sübuta yetirilmiş hesab edib.Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssisəsində çəkməklə Rabil Qasımov 9 il müddətinə azadlıqdan məhrum olunub.
Daha ətraflı məlumat və yeniliklər üçün ain.az saytını izləyin.
