İranla davam edən hərbi münaqişə fonunda Hörmüz boğazı vasitəsilə həyata keçirilən dəniz daşımaları üçün sığorta xidmətləri hələ də mümkün olsa da, onların qiyməti rekord həddə çatıb.
AFN.az xəbər verir ki, bu barədə "Bloomberg" agentliyi məlumat yayıb. Bildirilir ki, bölgədəki risklərin artması sığorta bazarına ciddi təsir göstərib.
Hazırda sığorta haqqı gəminin ümumi dəyərinin təxminən 5%-nə bərabərdir ki, bu da müharibənin ilk günləri ilə müqayisədə beş dəfə çoxdur. Praktiki baxımdan bu o deməkdir ki, dəyəri 100 milyon dollar olan bir neft tankerinin təhlükəsizlik sığortası üçün sahibləri indi təxminən 5 milyon dollar ödəməli olurlar.
Ekspertlər qeyd edirlər ki, tariflərin bu dərəcədə yüksək olmasına baxmayaraq, bazarda hələ də təkliflərin olması vacib siqnaldır. Bu, strateji su yolunu keçməyə cəsarət edən az sayda gəmi üçün sığorta imkanlarının tamamilə qapanmadığını göstərir. Bununla belə, artan xərclərin son nəticədə qlobal enerji daşımalarının və neftin qiymətinə təsir edəcəyi qaçılmaz hesab olunur.
Bundan əlavə, Hindistan və digər ölkələrin mülki gəmilərinin təhlükəsiz keçidini təmin etmək üçün İranla apardığı diplomatik danışıqlar sığorta şirkətləri tərəfindən yaxından izlənilir. Regionda hərbi gərginlik azaldığı təqdirdə bu rəqəmlərin yenidən sabitləşəcəyi gözlənilir.
