Bakı Apellyasiya Məhkəməsində qəsdən sağlamlığa yüngül zərər vurmada təqsirləndirilən Nihad Quliyev (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Habil Məmmədovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti və apellyasiya şikayətinə əlavə təmin edilməyib, Sabunçu Rayon Məhkəməsinin hökmü dəyişdirilib. Təqsirləndirilən şəxs barəsində “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 2.6, 5.2.1 və 5.3-cü bəndləri tətbiq edilməklə o, təyin edilmiş 1 il müddətinə azadlığın məhdudlaşdırılması (elektron qolbaq) cəzasından azad olunub. Nihad Quliyev barəsində seçilmiş başqa yerə getməmək barədə iltizam qətimkan tədbiri ləğv edilib.
İttihama görə, hadisə 2024-cü ildə paytaxtın Sabunçu rayonunda baş verib.
Belə ki, Nihad Quliyev ilə qonşusu, zərərçəkmiş Məhəbbət Bayramov (adı, soyadı şərtidir) arasında əvvəldən gərgin münasibətlər mövcud olub. Bu isə internet xəttinin kabellərinin onun peyk anteninin naqilinə mane olması və avtomobilin yaşadığı evin qarşısında saxlanılması ilə bağlı yaranıb. Nəticədə tərəflər arasında mübahisə düşüb. Mübahisə zamanı təqsirləndirilən şəxs həyətindən götürdüyü bel ilə qonşusunun sol əl nahiyəsinə zərbə vurub. Nəticədə Nahidin sol əlində kəsilmiş yaralar əmələ gəlib və sağlamlığın qısa müddətə pozulmasına səbəb olan bədən xəsarəti yetirilib.
Sabunçu Rayon Məhkəməsinin hökmü ilə təqsirləndirilən şəxs 1 il müddətinə azadlığın məhdudlaşdırılması (elektron qolbaq) cəzasına məhkum edilmişdi. İbtidai istintaq zamanı 2 gün həbsdə saxlanılması nəzərə alınıb və həmin müddət cəzadan çıxılmışdı. Beləliklə, onun üzərində 11 ay 26 gün müddətinə azadlığın məhdudlaşdırılması cəzası qalmışdı.
Kamal Məmmədov
