Günün ilk şəfəqləri obaşdan boylandıqca sanki ilin son nəfəsi, baharın ilk pıçıltısı gəlir bu sabahdan.
Gün başlayır, hər kəs xoş təlaş içində axşama-gələcəyə ümid dolu addımlarla bu gecəyə keçmişdən gələn bir doğma inamla irəliləyirik. Bu gecədən gözləntilərimiz çoxdur.
Bu gecədə təkcə tonqallar yanmır , qəlblər də işıqlanır yeni ümidlərlə, köhnə kədər külə dönür, ümidlər isə alov kimi yenidən doğulur. Yeni həyat gəlir bu gecə…
Torpağın sinəsində gizlənən həyat bu gecə oyanır. Sular pıçıldayır, küləklər gizli qalan sirləri danışır sanki, axşamın alatoranından qalanan od insanın içindəki qaranlığı yandırıb aparır. Hər alovun içində bir arzu, hər qığılcımda bir dua var sanki…
Yanan oduncaq parçalarının yaratdığı tonqalın üstündə bir kəramət var düşüncəmizdə : “ağırlığım-uğurluğum odda qalsın” keçmişin yükünü də arxada qoyur, elə bil…
Bu gecə qapıların döyülən tərəfinə beli qırmızı kəmərli səmənilər də ümidlə boylanır, süfrələr bərəkətlə yol gözləyir.
Amma ən önəmlisi qırğın ürəklər də barışa açılır. Sınmış könüllərə məlhəmin adıdır İlaxır çərşənbə.
Hər gəlişi ilə barış gətirir, incikliklər bahara yaraşmaz axı..
Bəlkə də bu gecə birini bağışlamaq, birini xatırlamaq, birinə dua etmək elə ən əsası özümüzə ehtiyac olduğu üçün baharı sevirik. Gəlsin, bir an öncə təbiətin xoşxəbər qızı deyirik .
Hər yeni bahar, yalnız təbiətin deyil, insanın da yenidən doğuluşudur. Hər təmir olunmuş könül yeni həyat demək deyilmi?
Qoy ürəklər sınmasın heç, könlü xoş bayram edək baharı.
Qoy arzuların çin olacağı bayram olsun, martdan gözləntilərimiz çoxdur.
Qoy bu İlaxır çərşənbə həyatımıza işıq gətirsin, qəlblərdəki qaranlıqları sonsuza qədər yandırsın, yerinə sevgi, mərhəmət və ümid gətirsin…
Xalqımıza barış, sülh, əmin-amanlıq yaraşır. Baharın gətirdiyi sevinc il boyu Vətənə,millətə yoldaş olsun.
Qoy Azərbaycanımın qüdrəti daima dünyaya səs salsın. Azad ölkədə firavan yaşamaq, baharı əmin-amanlıqla qeyd etmək hər zaman millətimə nəsib olsun.
Səngərlərimizdən yalnız xoş xidmət xəbərləri gəlsin, qurumlarımızın uğurları dövlətimizə hər zaman başucalığı gətirsin.
Bədxahlardan uzaq, xalq olaraq həmrəy, yad və gərəksiz ünsürlərdən uzaq, Vətənə sədaqət dolu xeyirli bir il olsun.
Biz birlikdə güclüyük.
Azərbaycana bahar ,sevinc, zəfər, qüdrət yaraşır.
Baharın rəmzi olan yaşıllıq, gözəllik qəlblərimizə yansısın. Unutmayaq ki, ən böyük bahar insanın içində başlayır. Qəlbimiz bahar olsun ki, ətrafa gözəllik, dostluq, birlik saça bilək.
Bayramımız mübarək!
