ain.az, Azertag saytına istinadən bildirir.
Bakı, 6 mart, AZƏRTAC
Serbiyanın şimalında yerləşən Zrenyanin şəhəri növbəti dəfə beynəlxalq idman tədbirinə ev sahibliyi edərək Avropanın diqqət mərkəzinə çevrildi.
Burada keçirilən güləş üzrə U-23 Avropa çempionatı idmançıların bacarıqlarını nümayiş etdirdiyi mühüm yarış kimi yadda qaldı.
Azərbaycan güləşçiləri bu mötəbər turnirdə yüksək əzmkarlıq və peşəkarlıq nümayiş etdirərək ümumilikdə 16 medal ( 3 qızıl, 7 gümüş və 6 bürünc) qazanmaqla ölkəmizin idman tarixində növbəti uğurlu səhifəni yazdılar. Bu nəticə bir daha sübut etdi ki, Azərbaycan güləşi Avropada aparıcı mövqeyini qoruyub saxlayır.
Zrenyanin şəhəri özünəməxsus tarixi və sakit həyat tərzi ilə tanınır. Voyvodina muxtar vilayətində yerləşən bu şəhər qədim memarlıq nümunələri, geniş parkları və inkişaf etmiş idman infrastrukturu ilə seçilir. Yarışın keçirildiyi idman kompleksi müasir standartlara cavab verməklə yanaşı, iştirakçılar və azarkeşlər üçün kifayət qədər əlverişli idi.
Avropa çempionat ərzində şəhərdə əsl idman bayramı hökm sürdü. Müxtəlif ölkələrdən gələn idmançılar, məşqçilər və azarkeşlər Zrenyaninə xüsusi rəng qatdılar. Küçələrdə fərqli dillərdə söhbətlər, arenada isə gərgin və həyəcanlı mübarizə var idi.
Azərbaycan millisinin çıxışı xüsusilə diqqət çəkdi. Təmsilçilərimiz hər üç növdə – sərbəst, yunan-Roma və qadın güləşində əzmlə mübarizə apararaq fəxri kürsüyə yüksəlməyi bacardılar. Qazanılan medallar yalnız fərdi nailiyyət deyil, həm də ölkəmizdə güləş məktəbinin güclü olmasının bariz göstəricisidir.
Bu uğur qarşıdakı nüfuzlu beynəlxalq yarışlar üçün ciddi stimul yaradır. Gənc idmançıların göstərdiyi nəticələr onların gələcəkdə böyük arenalarda da söz sahibi olacağına inamı artırır.
Beləliklə, Zrenyanin şəhərində keçirilən qitə çempionat təkcə idman yarışı deyil, həm də dostluq, rəqabət və idman ruhunun təntənəsi kimi yadda qaldı. Azərbaycan güləşçilərinin qazandığı 16 medal isə bu mötəbər yarışın bizim üçün ən yaddaqalan anlarından biri oldu. Komanda hesabında sərbəst güləş yığmamız 2-ci, yunan-Roma millimiz 4-cü, qadınlardan ibarət komandamız isə 6-cı oldu.
Daha ətraflı məlumat və yeniliklər üçün ain.az saytını izləyin.
