Paşinyan Gürcüstan Patriarxı II İlyanın dəfn mərasimində Erməni Apostol Kilsəsinin rəhbəri II Qareginin iştirakı ilə bağlı suala qeyri-müəyyən cavab verib. » AzadMedia.az

Ermənistanın Baş naziri Nikol Paşinyan Gürcüstan Patriarxı II İlyanın dəfn mərasimində Erməni Apostol Kilsəsinin rəhbəri II Qareginin iştirakı ilə bağlı suala qeyri-müəyyən cavab verib.

Martın 19-da keçirilən brifinq zamanı jurnalistlərin sualını cavablandıran Paşinyan bildirib ki, dəfn mərasimində iştirak etmək üçün İrəvandan Tbilisiyə yüksək səviyyəli nümayəndə heyətinin göndərilməsi planlaşdırılır. Onun sözlərinə görə, özü də Gürcüstan hökumətinin rəhbəri ilə əlaqə saxlayaraq şəxsən başsağlığı verməyə hazırlaşır.

Baş nazir qeyd edib ki, hökumət nümayəndə heyətinin iştirak formatı hələ müzakirə olunur və digər mümkün formatlar barədə danışmaq üçün tezdir. Eyni zamanda Paşinyan, II Qareginin dünyəvi adı olan Ktrij Nersisyanla bağlı sualı cavablandırarkən, onu katolikos kimi tanımadığını bildirib.

Məsələ regionda kilsə və dövlət münasibətləri fonunda diqqət çəkən məqamlardan biri kimi qiymətləndirilir.