Məşhur model Tülin Şahinin süd vəzində xərçəng riski daşıyan şiş olduğu və buna görə əməliyyat olunacağı açıqlanıb. Uzun illərdir qadınlara erkən diaqnozun həyat qurtardığını vurğulayan Şahin, özünün də eyni reallıqla qarşılaşdığını bildirib.
NOCOMMENT.az xəbər verir ki, Tülin Şahin süd vəzi xərçəngi ilə bağlı qlobal məlumatlandırma hərəkatının öncüllərindən biri olaraq, özündə aşkar edilən şişlə bağlı şəxsi açıqlama verib.
O, erkən diaqnozun əhəmiyyətinə diqqət çəkərək, illərdir qadınlara erkən diaqnozun həyat qurtardığını dediyini xatırladıb və indi eyni reallıqla üz-üzə qaldığını söyləyib.
Tülin Şahin müayinələr nəticəsində süd vəzində şübhəli bir şiş aşkarlandığını və həkimlərin əməliyyat olunmağı məsləhət gördüklərini bildirib.
“Tezliklə əməliyyat olunacağam. Yaxşıyam. Güclüyəm”, — deyən model, qadınların erkən diaqnozun vacibliyini anlaması üçün öz təcrübəsini paylaşdığını vurğulayıb:
“Dünyada hər 14 saniyədə bir qadına döş xərçəngi diaqnozu qoyulur”.
T. Şahin bir çox qadının xəstəlikdən deyil, mühakimə olunmaqdan qorxduğunu qeyd edib:
“İşlərini itirməkdən, etiketlənməkdən, səhv başa düşülməkdən qorxurlar. Amma sağlamlıq utanılacaq bir mövzu deyil. Bir ana olaraq həyatıma və işimə eyni qətiyyətlə davam edirəm. Qızım və ailəm mənim hər şeyimdir”.
Şahin süd vəzi xərçənginə qarşı mübarizənin yalnız bir paylaşım deyil, həm də bir xatırlatma olduğunu vurğulayaraq, erkən diaqnozun həyatı xilas etdiyini təkrarlayıb:
“Bu müddət ərzində istehsal etməyə, işləməyə və dik durmağa davam edəcəyəm”.//sfera.az
