Rusiya yalnız ABŞ ilə ikitərəfli münasibətlər normallaşdıqdan və Vaşinqtonun Rusiyanın təhlükəsizlik maraqlarına hörmət göstərdiyi halda silahlanmaya nəzarət üzrə müzakirələrə qayıtmağa hazırdır. Bunu Rusiyanın BMT-nın Cenevrə bölməsindəki daimi nümayəndəsi Gennadi Qatilov bildirib.
Diplomat strateji sabitlik üzrə yeni razılaşmanın perspektivlərindən danışaraq qeyd edib ki, amerikalı həmkarlarla əməkdaşlıq yalnız yığılıb qalan ziddiyyətlər və gərginlik amilləri aradan qaldırıldıqdan sonra mümkündür.
Onun sözlərinə görə, Moskva qlobal təhlükəsizliyin qorunmasında öz rolunu tam dərk edir. Eyni zamanda Rusiya Strateji Hücum Silahları Müqaviləsinin müddətinin başa çatmasını və Vaşinqtonun onun məhdudiyyətlərinə əlavə bir il könüllü əməl etməkdən imtina etməsini obyektiv reallıq kimi qəbul edir.
“ABŞ-ın bu müqavilənin onların milli təhlükəsizliyi üçün guya zərərli olması ilə bağlı arqumentlərini bölüşmürük, lakin bunu amerikalı həmkarlarımızın vicdanına buraxırıq”, — deyə Qatilov bildirib.
ABŞ tərəfi hazırda danışıqların çoxtərəfli formatda aparılmasında israr edir. Rusiya nümayəndəsi xəbərdarlıq edib ki, belə olacağı təqdirdə Moskva Böyük Britaniya və Fransa-nın da məcburi şəkildə danışıqlarda iştirakını tələb edəcək. Bu ölkələr NATO çərçivəsində ABŞ-ın əsas müttəfiqləri olmaqla yanaşı, ciddi nüvə potensialına malikdirlər.
“Bu yanaşmamızın doğruluğunu həmin ölkələrin milli nüvə arsenalını artırmaq planları da təsdiqləyir”, — deyə diplomat vurğulayıb.
O, həmçinin Fransanın birgə nüvə missiyalarının coğrafiyasını genişləndirmək niyyətinə diqqət çəkərək bildirib ki, hazırda dialoqun başlanması üçün siyasi və strateji şərait mövcud deyil.
