Rusiya Prezidenti Vladimir Putin neft qiymətlərinin artdığını və qlobal bazarlarda qeyri-müəyyənliyin dərinləşdiyini bəyan edib. O, bildirib ki, xüsusilə Yaxın Şərqdə davam edən münaqişələrin nəticələri artıq proqnozlaşdırıla bilmir.
Sitat.info xəbər verir ki, Putin bu fikirləri Moskvada keçirilən Rusiya Sənayeçiləri və Sahibkarlar Birliyi (RSPP) iclasında səsləndirib.
Prezident vurğulayıb ki, Yaxın Şərqdəki gərginliklər beynəlxalq iqtisadi əlaqələrə ciddi zərbə vurur: “Bu vəziyyət logistika, istehsal və əməkdaşlıq zəncirlərinə mənfi təsir göstərir. Karbohidrogen və metal hasilatı, emalı, gübrə istehsalı kimi sahələr daxil olmaqla bir çox sektor bundan zərər görür.”
O, mövcud vəziyyəti COVID-19 pandemiyası dövrü ilə müqayisə edərək qeyd edib ki, hazırkı münaqişələrin nəticələri daha da qeyri-müəyyəndir: “Hətta münaqişədə iştirak edən tərəflər belə gələcək nəticələri dəqiq proqnozlaşdıra bilmirlər.”
Putin həmçinin Rusiyanın artan əmtəə qiymətlərindən əldə etdiyi gəlirlərdən ehtiyatla istifadə etməsinin vacibliyini vurğulayıb. Onun sözlərinə görə, bazarlar hazırda qeyri-sabitdir: “Bu gün bir istiqamətdə hərəkət edən bazar sabah tam əks istiqamətə yönələ bilər.”
Sonda o qeyd edib ki, qlobal ticarətdəki qeyri-sabitlik artıq yeni reallığa çevrilir və bu şəraitdə Rusiya iqtisadiyyatının gücləndirilməsi prioritet olaraq qalır.
Aytac,
Sitat.info
