Son sorğular Rusiyada hakimiyyətə dəstəyin zəiflədiyini göstərir.
Musavat.com xəbər verir ki, bu barədə Rusiyanın “Levada” mərkəzinin 2026-cı ilin mart ayına dair sorğusunda məlumatlar açıqlanıb.
Araşdırmaya görə, ölkənin yanlış istiqamətdə getdiyini düşünənlərin sayı son bir ildə 16 faizdən 26 faizə yüksəlib, yəni təxminən 1,5 dəfə artıb. Bu, son üç ilin ən yüksək göstəricilərindən biri hesab olunur.
Eyni zamanda ölkənin düzgün kursda olduğunu düşünənlərin payı 61 faizə qədər azalıb. Müqayisə üçün, müharibənin ilk illərində bu göstərici 75 faizə çatırdı.
Sorğu göstərir ki, narazılıq daha çox:
- gənclər (32%)
- aşağı gəlirli təbəqə
- internet və “YouTube” istifadəçiləri arasında yayılıb.
Prezident Vladimir Putinin reytinqi də son üç ilin minimumuna düşüb – 82 faiz (2025-ci ilin payızından 7 faiz azalma). Eyni zamanda narazıların payı 15 faizə yüksəlib.
Hökumət və baş nazir Mixail Mişustinə dəstək daha sürətlə azalır. Kabinetin fəaliyyətini bəyənənlərin payı 64 faizə düşüb, narazıların sayı isə 29 faizə yüksəlib. Mişustinin şəxsi reytinqi 66 faiz səviyyəsinə enib.
Rusiya Dövlət Dumasına dəstək də zəifləyib – hazırda cəmi 53 faiz vətəndaş parlamentin fəaliyyətini bəyənir. Ən yüksək antireytinq isə sabiq prezident Dmitri Medvedyevə aiddir – onu 62 faiz vətəndaş bəyənmir.
Cəmiyyətdə ümumi psixoloji vəziyyət də pisləşir. Sorğuya görə:
- mənfi emosiyalar (qorxu, narahatlıq, aqressiya) 24 faizə yüksəlib
- “yaxşı əhval” isə cəmi 13 faiz təşkil edir
“Levada” mərkəzinin direktoru Denis Volkov bildirib ki, cəmiyyətdə müharibədən yorğunluq artır. Əsas narazılıq səbəbləri kimi:
- qiymət artımı və kommunal xərclər
- internet məhdudiyyətləri
- Ukrayna dron hücumları
- nəticəsiz sülh danışıqları göstərilir
Eyni tendensiyanı dövlətə bağlı sorğular da təsdiqləyir. VTSIOM-un (Ümumrusiya İctimai Rəyin Araşdırılması Mərkəzi) məlumatına görə, fevralın sonunda cəmi 32,1 faiz respondent Putini etibar edilən siyasətçi kimi göstərib ki, bu da müharibə dövründə ən aşağı göstəricidir.
Musavat.com
