Vaşinqtonun “Alyaska razılaşmaları” üzrə Kiyevlə işlədiyi bildirilir, Donbas məsələsi isə sülh yolunda əsas maneə kimi qalır...
Poliqon xəbər verir ki, Rusiya Xarici İşlər Nazirliyinin (XİN) müavini Mixail Qaluzin ABŞ-nin Ukraynanı Moskva ilə kompromisə razı salmaq istiqamətində fəal iş apardığını bildirib. O, bu barədə TASS Agentliyinə Rusiya–Özbəkistan “Valday” klubu və Özbəkistan Prezidentinin Strateji və Regionlararası Araşdırmalar İnstitutu tərəfindən təşkil olunan konfrans çərçivəsində müsahibəsində danışıb.
Diplomat qeyd edib ki, tərəflər arasında dialoq ötən il Alyaskada Rusiya prezidenti Vladimir Putin və ABŞ prezidenti Donald Tramp arasında keçirilmiş yüksək səviyyəli görüş zamanı əldə olunan qarşılıqlı anlaşmalar əsasında davam etdirilməlidir. Onun sözlərinə görə, həmin razılaşmalar üçtərəfli format çərçivəsində müzakirələrin əsasını təşkil edir.
Qaluzin vurğulayıb ki, ABŞ tərəfindən kompromis xarakterli müəyyən təkliflər irəli sürülüb və Rusiya tərəfi bu təklifləri qəbul edib. Diplomatın fikrincə, bu ideyaların əsas üstünlüyü onların münaqişənin kök səbəblərinə fokuslanması və bu səbəblərin aradan qaldırılmasına yönəlməsidir. O əlavə edib ki, hazırda əsas məsələ ABŞ-nin Ukraynanı bu təklifləri qəbul etməyə razı salmasıdır.
Rusiya XİN rəsmisi bildirib ki, Vaşinqton hazırda Kiyevlə məhz bu istiqamətdə işləyir. Bununla yanaşı, o xatırladıb ki, Ukrayna prezidenti Volodimir Zelenski Donbas ərazilərindən qoşunların çıxarılmasına razı olmadığını açıqlayıb. Qaluzin bu mövqenin Alyaskada əldə olunan anlaşmalarla uyğun gəlmədiyini qeyd edib.
Ekspertlər hesab edirlər ki, ABŞ-nin vasitəçilik səyləri münaqişənin diplomatik həlli üçün yeni imkanlar yaratsa da, tərəflər arasında mövqelərin hələ də ciddi şəkildə fərqli olması prosesin mürəkkəbliyini artırır.
Poliqon.info
