Ağ Ev rəhbəri Hörmüz boğazı açılmadan qərar verilməyəcəyini bildirib və sərt açıqlamalar səsləndirib...
Poliqon xəbər verir ki, ABŞ Prezidenti Donald Tramp sosial şəbəkə hesabında İranla bağlı diqqətçəkən açıqlama verib. O bildirib ki, İranın yeni prezidenti ABŞ-yə müraciət edərək atəşkəs istəyib.
Tramp paylaşımında qeyd edib ki, “İranın yeni rejiminin prezidenti, əvvəlkilərlə müqayisədə daha az radikal və daha rasional bir şəxs, az əvvəl ABŞ-dən ATƏŞKƏS istəyib”. ABŞ lideri bu müraciətin nəzərdən keçiriləcəyini vurğulasa da, bunun müəyyən şərtlərlə bağlı olduğunu bildirib.
Onun sözlərinə görə, əsas şərt Hörmüz boğazının açıq, sərbəst və təhlükəsiz vəziyyətə gətirilməsidir. Tramp qeyd edib ki, yalnız bu halda ABŞ mümkün atəşkəs məsələsini dəyərləndirə bilər.
Bununla yanaşı, ABŞ prezidenti sərt ritorika ilə çıxış edərək bildirib ki, bu şərt yerinə yetirilmədiyi təqdirdə Vaşinqton İrana qarşı hərbi əməliyyatları davam etdirəcək. O, “əks halda İranı məhv edəcəyik və ya necə deyərlər, onu daş dövrünə qaytaracağıq” ifadəsini işlədib.
Ekspertlər hesab edirlər ki, bu cür bəyanatlar regionda gərginliyin daha da artmasına səbəb ola bilər və diplomatik həll imkanlarını çətinləşdirə bilər. Bununla yanaşı, Hörmüz boğazının açılması məsələsi qlobal enerji bazarları üçün də strateji əhəmiyyət daşıyır.
Poliqon.info
