Başımız qarışıb ABŞ-İran müharibəsində “vuruşmağa”, bir də xəbər tutduq ki, Rövşən Nəcəfin AFFA prezidenti “seçilməsi”ndən iki il ötür.
İki il az deyil ha, bir igidin ömrüdür. Futbolda iki ildə çox iş görmək olardı. Bəs Rövşən Nəcəfin komandası hansı işi görüb bu iki ildə?
Mənim xatırladığım bir iş var: əcnəbilərə 5 milyon manat verib “Azərbaycana futbolun inkişaf strategiyası”nı yazdırıblar. Bəs haradadır o strategiyanın nəticəsi? Hələ ki, toz altındadır. Yəqin ki, etibarlı yerdə, AFFA-nın baş katibi Cahangir Fərəcullayevin otağındadır.
Ümid edirəm ki, hərdən tozunu alır o strategiyanın. Və bir də, Rövşən Nəcəfin “seçilməsi”nin iki ili tamam olanda elə bu Cahangir Fərəcullayev şok açıqlama verdi.
Yəqin ki, başımız ABŞ-İran müharibəsinə qarışmasaydı, cəmiyyətimiz silkələnərdi bu açıqlamadan.
