Yasamal Rayon Məhkəməsində qəsdən sağlamlığa yüngül zərər vurma təqsirləndirilən Xalid Fərəcovun (adı, soyadı şərtidir) cinayət işi üzrə məhkəmə iclası başa çatıb.
Pravda.az-ın əldə etdiyi məlumata görə, hakim Orxan Məmmədlinin sədrliyi ilə keçirilən prosesdə hökm oxunub.
Məhkəmənin hökmü ilə ona aylıq qazancından dövlət nəfinə 15 faiz pul tutulmaqla 1 il müddətinə islah işləri cəzası təyin edilib.
İttihama görə, hadisə 04 fevral 2026-cı il tarixdə, saat 13:00 radələrində paytaxtın Ə.Ələkbərov küçəsində qeydə alınıb. Belə ki, zərərçəkmiş Uğur Tağızadə (adı, soyadı şərtidir) həmin ünvanda olarkən əvvəllər tanıdığı təqsirləndirilən Xalid Fərəcovla aralarında borcun qaytarılması məsələsi ilə bağlı mübahisə yaranıb.
Araşdırmalarla müəyyən edilib ki, təqsirləndirilən şəxs zərərçəkmiş şəxsin borcun qaytarılması ilə bağlı onunla kobud danışmasından əsəbiləşərək şəxsi münasibətlərin pozulması zəminində baş vermiş münaqişə zamanı qəsdən yumruqla Uğurun üz nahiyəsinə bir dəfə zərbə endirib. Nəticədə zərərçəkmiş şəxsə sol gözün ağlı qişasına qansızma ilə müşayiət olunan alt göz qapağının qançırı, eləcə də sol gözaltı və almacıq nahiyəsində qançır-şişkinlik kimi xəsarətlər yetirilib.
Məhkəmə iclasında ifadə verən Xalid Fərəcov ona qarşı irəli sürülmüş ittiham üzrə özünü təqsirli bilib. O, ifadəsində bildirib ki, zərərçəkmiş şəxs ilə birlikdə avtomobil dayanacağında nəzarətçi (“parkovşik”) kimi işləyirlər.
Xalidin sözlərinə görə, Uğurdan borc pul alıb və qısa müddətdə qaytaracağını desə də, sonradan bu məsələ ilə bağlı aralarında mübahisə yaranıb. Mübahisə zamanı əsəbiləşərək ona zərbə endirib.
Təqsirləndirilən şəxs hazırda zərərçəkmiş şəxslə barışdığını, borcunu qaytardığını və törətdiyi əməldən peşman olduğunu bildirib. O, məhkəmədən barəsində yüngül cəza təyin olunmasını xahiş edib.
Kamal Məmmədov
