Türkiyə Prezidenti Rəcəb Tayyib Ərdoğan İsrailin İstanbulda yerləşən Baş Konsulluğuna qarşı həyata keçirilən hücumu sərt şəkildə qınayaraq, baş verənləri çirkin təxribat adlandırıb.
Moderator.az xəbər verir ki, dövlət başçısı bunu Ankarada "Roketsan" müdafiə korporasiyasının yeni zavodunun açılış mərasimində çıxış edərkən deyib.
"İstanbulda törədilməyə cəhd edilən, lakin cəsur təhlükəsizlik əməkdaşlarımızın çevik müdaxiləsi ilə dəf olunan xain hücumu lənətləyirik. İnsident zamanı üç terrorçudan biri məhv edilib, digər ikisi isə yaralı olaraq ələ keçirilib. Eyni zamanda iki polis əməkdaşımız yüngül xəsarət alıb. Biz terrorun hər cür təzahürü ilə barışmaz mübarizəmizi mütləq şəkildə davam etdirəcəyik. Bu cür xain və qabaqcadan düşünülmüş təxribat cəhdlərinin Türkiyənin sabitliyinə xələl gətirməsinə əsla yol verməyəcəyik", - deyə Ərdoğan bildirib.
Dövlət başçısı həmçinin vurğulayıb ki, hazırda İstanbul Baş Prokurorluğu və müvafiq kəşfiyyat orqanları tərəfindən sözügedən terror cəhdi ilə əlaqədar təxirəsalınmaz istintaq tədbirlərinə başlanılıb.
