ABŞ prezidenti Donald Trump İranın enerji infrastrukturuna planlaşdırılan zərbələrin iki həftə müddətinə təxirə salındığını açıqlayıb. O, bu barədə “Truth” hesabında paylaşım edib.
Trump bildirib ki, Shehbaz Sharif və Asim Munir ilə danışıqlardan sonra, həmçinin onların İrana göndərilən dağıdıcı qüvvənin qarşısını almaq xahişinə əsasən bu qərarı verib. Onun sözlərinə görə, İran İslam Respublikası Hörmüz boğazının tam, dərhal və təhlükəsiz şəkildə açılmasına razılıq verib və bu addım ikitərəfli atəşkəs çərçivəsində atılıb.
ABŞ lideri qeyd edib ki, artıq bütün hərbi məqsədlərə çatılıb və hətta aşılıb. O vurğulayıb ki, İranla uzunmüddətli sülh və Yaxın Şərqdə sabitlik üzrə qəti saziş üzərində ciddi irəliləyiş əldə olunub. Trump əlavə edib ki, İrandan 10 bəndlik təklif alınıb və bu təklif danışıqlar üçün işlək əsas kimi qiymətləndirilir.
Onun sözlərinə görə, mübahisəli məsələlərin demək olar ki, hamısı ABŞ və İran arasında razılaşdırılıb. İki həftəlik müddət isə sazişin yekunlaşdırılması və həyata keçirilməsi üçün nəzərdə tutulub.
Məlumata görə, Tramp administrasiyası yaxın günlərdə İranla üzbəüz danışıqlar keçirməyi nəzərdən keçirir. Ehtimal olunan görüş Pakistanın vasitəçiliyi ilə İslamabadda baş tuta bilər və iştirakçılar arasında Steve Witkoff, Jared Kushner və vitse-prezident J. D. Vance yer ala bilər (mənbə: CNN).
Eyni zamanda, İran televiziyası bildirib ki, uranın zənginləşdirilməsinin qəbul edilməsi müharibəni dayandırmağa yönəlmiş on maddəlik razılaşmanın bir hissəsidir.
Associated Press isə xəbər verir ki, İran və Oman Hörmüz boğazından keçən gəmilərdən ödəniş alır. Mənbəyə görə, iki həftəlik atəşkəs planına bu ödənişlərin davam etməsinə icazə verilməsi də daxildir.
Qeyd olunub ki, İran Hörmüz boğazından əldə olunan gəliri ölkənin yenidən qurulmasına yönəltməyi planlaşdırır, Omanın bu vəsaitlərlə bağlı planları isə hələlik məlum deyil.
