Aprelin 10-da Pakistanın paytaxtı İslamabadda keçiriləcək tarixi ABŞ-İran danışıqlarında tərəfləri təmsil edəcək heyətin tərkibi məlum olub.
Musavat.com xəbər verir ki, İran nümayəndə heyətinə parlamentin spikeri Məhəmməd Baqir Qalibaf başçılıq edəcək.
ISNA agentliyinin yaydığı məlumata görə, Qalibafın bu missiyaya rəhbər təyin olunması Tehranın danışıqlara verdiyi yüksək önəmin göstəricisidir, çünki o, ölkənin həm hərbi, həm də siyasi elitasında ən nüfuzlu simalardan biri sayılır.
CNN-in məlumatına görə, ABŞ tərəfindən danışıqlar masasında vitse-prezident Cey Di Vens əyləşəcək ki, bu da Vaşinqtonun sülh prosesinə verdiyi ən yüksək səviyyəli dəstəkdir. Amerika nümayəndə heyətinə həmçinin prezidentin xüsusi elçisi Stiv Uitkoff və Yaxın Şərq üzrə təcrübəli diplomatik gedişləri ilə tanınan sahibkar Cared Kuşner də daxildir.
Donald Trampın şəxsi nəzarəti altında keçirilən bu görüşdə əsas məqsəd 15 bəndlik genişmiqyaslı sülh planını və Hörmüz boğazının tam açılmasını rəsmiləşdirməkdir.
Ekspertlər Qalibaf və Vens kimi "sərt xətt" tərəfdarlarının masada oturmasını hər iki ölkənin daxili auditoriyası üçün qəbul edilə bilən və icrası məcburi olan sənədin hazırlanması üçün həlledici addım kimi qiymətləndirirlər.
Aprelin 10-da başlanacaq bu müzakirələr 2026-cı ilin ən böyük diplomatik hadisəsi və Yaxın Şərqdə genişmiqyaslı müharibənin rəsmən bitmə nöqtəsi ola bilər.
Musavat.com
