ain.az xəbər verir, Bizimyol saytına əsaslanaraq.
ABŞ prezidenti Donald Trump administrasiyası NATO üzvlərinə qarşı yeni yanaşma hazırlayır.
Bizimyol.info xəbər verir ki, "The Times" nəşrinin məlumatına görə, Vaşinqton alyans ölkələrinin İranla bağlı vəziyyətdəki fəaliyyətini qiymətləndirmək üçün audit keçirməyi planlaşdırır. Nəticələrə əsasən, “kifayət qədər dəstək göstərməyən” dövlətlər cəzalandırıla bilər.
Məlumata görə, əsas müzakirə mövzularından biri Hörmüz boğazında təhlükəsizliyin təmin olunmasıdır. ABŞ müttəfiqlərdən bu istiqamətdə daha aktiv hərbi iştirak tələb edir. Yardım göstərməyən ölkələr isə siyasi və hərbi nəticələrlə üzləşə bilər. Variantlardan biri kimi ABŞ qoşunlarının bəzi ölkələrdən çıxarılması da nəzərdən keçirilir.
Vaşinqtonun təzyiqləri Böyük Britaniyanın baş naziri Keir Starmer ilə münasibətlər fonunda daha da diqqət çəkir. Starmer son açıqlamalarında Trampın siyasətini sərt tənqid edərək, bunun enerji xərclərinin artmasına səbəb olduğunu bildirib. Buna baxmayaraq, tərəflər Hörmüz boğazında gəmiçiliyin bərpası ilə bağlı əməkdaşlığı müzakirə edirlər.
NATO-nun baş katibi Mark Rutte isə alyans üzvlərinə xəbərdarlıq edib ki, yalnız siyasi dəstək kifayət etməyəcək. Onun sözlərinə görə, ABŞ konkret hərbi öhdəliklər gözləyir və yaxın günlərdə üzv ölkələrin real fəaliyyəti qiymətləndiriləcək.
Ağ Ev də bu mövqeni təsdiqləyib. ABŞ dövlət katibi Marco Rubio NATO-nun məqsədəuyğunluğu ilə bağlı suallar qaldıraraq, Vaşinqtonun böyük maliyyə və hərbi resurslar ayırdığı halda müttəfiqlərdən daha çox dəstək gözlədiyini vurğulayıb.
Qeyd olunur ki, Tramp NATO-nu daha əvvəl “kağız pələng” adlandırıb və müttəfiqlərin reaksiyasını qeyri-kafi hesab edib. Yeni audit təşəbbüsü də məhz bu narazılığın nəticəsi kimi qiymətləndirilir.
Hazırkı müzakirələr fonunda bəzi ölkələrin daha çox risk altında olduğu bildirilir. Xüsusilə İspaniya və Fransanın fəaliyyəti ABŞ tərəfindən yetərsiz hesab olunur.
Beləliklə, Vaşinqtonun planlaşdırdığı audit və mümkün sanksiyalar NATO daxilində münasibətləri daha da gərginləşdirə və alyansın gələcək fəaliyyət istiqamətlərinə ciddi təsir göstərə bilər.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
