İsrail və Livan rəsmi olaraq atəşkəs və davamlı sülh danışıqlarına başlayır. Rəsmi mənbələrə görə, dialoq diplomatik səviyyədə aparılacaq və hər iki ölkənin Vaşinqtondakı səfirləri iştirak edəcək. ABŞ-nin Livandakı səfiri M. İssa birbaşa dəstək və koordinasiya təmin edəcək. Rəsmi əlaqələrə başlamaq qərarı Vaşinqtonun regiondakı vəziyyəti sabitləşdirmək üçün intensiv diplomatik səylərindən sonra verilib.
Bu addımdan əvvəl İsrailin Baş naziri Binyamin Netanyahu ilə ABŞ Prezidenti Donald Tramp arasında telefon danışığı olub. Söhbət zamanı Amerika lideri İsrail baş nazirindən Livandakı hədəflərə İsrail Müdafiə Qüvvələrinin zərbələrinin intensivliyini azaltmağı xahiş edib. Ağ Evin məlumatına görə, İranla yeni başlayan atəşkəsin pozulmasının qarşısını almaq və diplomatiya üçün əlverişli şərait yaratmaq üçün gərginliyin azaldılması zəruridir.
ABŞ Prezidenti Binyamin Netanyahu ilə məsləhətləşmələrdən dərhal sonra təhlükəsizlik kabinetinə mümkün qədər tez danışıqlara başlamağı tapşırıb. Baş nazir vurğulayıb ki, İsrailin bu danışıqlarda əsas prioriteti Hizbullahın tam tərksilah edilməsi olacaq. Əsas məqsəd iki dövlət arasında davamlı sülh yaratmaq, İsrailin şimalının atəşə tutulması təhlükəsini aradan qaldırmaqdır.
Rəsmi görüşlərin cədvəlləri hazırda dəqiqləşdirilsə də, hər iki tərəf uzun sürən hərbi münaqişədən çıxış yolu tapmaq üçün ABŞ-nin vasitəçilik platformasından istifadə etməyə hazır olduqlarını bildiriblər.
Rizvan CƏFƏROV,
“Azərbaycan”
