Pakistan, Misir və Türkiyə ABŞ ilə İran arasında yeni danışıqlar raundunu 21 aprelədək təşkil etməyə çalışır.
“İki sahil” xəbər verir ki, bu barədə "Axios" məlumat yayıb.
Məlumata əsasən, vasitəçi ölkələr tərəflər arasındakı fikir ayrılıqlarını azaltmaq və ABŞ ilə İrannı yenidən danışıqlar masasına qaytarmaq üçün aktiv diplomatik səylər göstərirlər. Hər iki tərəf hələ də razılaşmanın mümkün olduğunu düşünür.
Jurnalistlər qeyd edir ki, ABŞ Prezidenti Donald Trump dəniz blokadasının İranı mövqeyini dəyişməyə məcbur etməyəcəyi təqdirdə, infrastruktur obyektlərinə zərbələrin bərpasını nəzərdən keçirir.
Amerikalı rəsmilərin sözlərinə görə, Vaşinqtonun Pakistanda keçirilən danışıqlardan geri çəkilməsi və blokada ilə bağlı hədələr əslində davam edən danışıqlar prosesində təzyiq vasitəsi kimi istifadə olunur.
Məqalədə Yaxın Şərqdəki mənbəyə istinadən belə qeyd olunur: “Biz tam çıxılmaz vəziyyətdə deyilik. Qapı hələ bağlanmayıb. Hər iki tərəf sövdələşməyə çalışır. Bu, bir bazardır.”
Beləliklə, hazırkı vəziyyət gərgin olsa da, diplomatik həll ehtimalı hələ də qalmaqdadır və yaxın günlərdə yeni danışıqlar raundunun keçirilməsi istisna edilmir.
