Ölkənin fəlakətlərin idarə olunması agentliyinin məlumatına görə, martın 26-dan bəri Əfqanıstanda güclü yağışlar, daşqınlar, torpaq sürüşmələri və binaların uçması da daxil olmaqla bir sıra təbii fəlakətlər nəticəsində ən azı 189 nəfər ölüb.
Təkcə son iki gündə ən azı 22 nəfər ölüb, doqquz nəfər yaralanıb. Agentliyin sözçü müavini Tac Məhəmməd Hematın sözlərinə görə, ölümlərin əksəriyyəti daşqınlar zamanı evlərin uçması və boğulma nəticəsində baş verib.
Təbii fəlakətlər Kabil, Pərvan, Pəncşir, Paktiya, Paktika, Qəzni, Qəndəhar, Fərəh, Badğis, Bəlx, Sar-e Pul, Fəryab, Bədəxşan, Nəngərhar, Lağman və Kunar da daxil olmaqla bir neçə əyalətə təsir edib.
Son iki gündə daşqınlar ən azı 123,5 akr kənd təsərrüfatı sahəsini məhv edib. 451 evə ziyan dəyib, onlardan 48-i tamamilə dağılıb, 104-ü isə ciddi ziyan görüb.
BMT-nin Humanitar Məsələlərin Koordinasiyası Ofisinin məlumatına görə, ölkədə son daşqınlar və güclü yağışlar nəticəsində 73 mindən çox insan zərər çəkib. Əfqanıstanın əksər bölgələrində güclü yağışlar və qəfil daşqınlar davam edir.
Əziz MUSTAFA
