Xəbər verdiyimiz kimi, Türkiyənin Şanlıurfa vilayətinin Siverek rayonunda yerləşən Əhməd Koyuncu Peşə və Texniki Anadolu Liseyində silahlı insident baş verib.
NOCOMMENT.az-ın məlumatına görə, məktəbə daxil olan şəxs təsadüfi atəş açaraq çaxnaşmaya səbəb olub.
Hadisə ilə bağlı məlumat daxil olduqdan sonra əraziyə çoxsaylı polis, təcili tibbi yardım və xüsusi əməliyyat qrupları cəlb edilib.
Təhlükəsizlik qüvvələri məktəbdə geniş təhlükəsizlik tədbirləri həyata keçirib, şagirdlərin böyük hissəsi təxliyə olunub.
İlkin məlumata əsasən, silahlı hücum nəticəsində 7 nəfər yaralanıb. Yaralılara hadisə yerində ilkin tibbi yardım göstərildikdən sonra onlar xəstəxanaya yerləşdirilib.
Hücumu törədən şəxsin məktəbin tələbələrindən biri olduğu və bəzi şagirdləri girov götürdüyü iddia edilir. Hazırda hüquq-mühafizə orqanları tərəfindən şübhəlinin zərərsizləşdirilməsi istiqamətində əməliyyat davam etdirilir.
Hadisənin dəhşətli anları yaxınlıqdakı müşahidə kameraları tərəfindən qeydə alınıb.
Faktla bağlı genişmiqyaslı araşdırma aparılır.
