Çinin yaddaş çipi istehsalçısı YMTC istehsalını genişləndirmək üçün iki yeni zavod tikməyi planlaşdırır. Şirkətin hazırda bir yeni fabriki də tamamlanmaq üzrədir və bu layihələr bitdikdən sonra istehsal gücü iki dəfədən çox artacaq.
QHT.az xarici mediaya istinadən bildirir ki, yeni zavodların hər biri aylıq 100 min vafli istehsal edə biləcək. Mövcud müəssisələr isə birlikdə 200 min vafli istehsal edir. Hazırda üçüncü zavod tikilib və avadanlıqlar quraşdırılır, onun 2027-ci ilə qədər tam gücə çatması gözlənilir.
Məlumata görə, YMTC ABŞ sanksiyalarından sonra daha çox yerli şirkətlərlə işləməyə başlayıb. Avadanlıqların böyük hissəsi Çin istehsalçıları tərəfindən təmin olunur. Şirkət NAND yaddaş çipləri istehsal edir və telefon, kompüter kimi cihazlarda istifadə olunur.
YMTC həmçinin yeni “Xtacking 4.0” texnologiyası ilə inkişafını davam etdirir və DRAM bazarına da daxil olmağı planlaşdırır. Ümumilikdə bu addımlar Çin–ABŞ texnologiya gərginliyi fonunda ölkənin yarımkeçirici sahədə güclənməsinə xidmət edir.
