İran Hərbi Hava Qüvvələri Tehran üzərində uçuşlar üçün ən azı 2 ədəd "Mi-28" zərbə helikopterini cəlb edib.
Musavat.com xəbər verir ki, bu barədə "Military Watch Magazine" (MWM) jurnalı məlumat yayıb.
Nəşrin qeyd etdiyinə görə, "Mi-28" helikopterləri İranın silahlanmasında olan yeganə zərbə helikopterləridir.
Bu uçuşların İsrail və ABŞ tərəfindən həyata keçirilən bombardmanlardan sonra ölkənin hərbi qüdrətini və Tehranın aviasiya texnikasına sahib olduğunu nümayiş etdirmək məqsədi daşıdığı bildirilir.
Jurnal vurğulayır ki, "Mi-28" İranın ABŞ və müttəfiqlərinə qarşı hərbi əməliyyatlarına potensial olaraq mühüm töhfə verə bilər. Xüsusilə, bu helikopterlər qanadlı raketləri və pilotsuz uçuş aparatlarını (PUA) vura, həmçinin qırıcıları və digər hərbi təyyarələri məhv edə bilər.
Xatırladaq ki, fevralın 28-də ABŞ və İsrail İrana qarşı müharibəyə başlayıb, Tehran da daxil olmaqla ən böyük şəhərlər zərbələrə məruz qalıb.
İslam İnqilabı Keşikçiləri Korpusu (SEPAH) İsrailə hücum edərək genişmiqyaslı qisas əməliyyatı keçirdiyini bəyan edib. İran hakimiyyəti, həmçinin Hörmüz boğazını ABŞ, İsrail və müharibəni dəstəkləyən ölkələrlə əlaqəli gəmilər üçün bağlamaq qərarına gəlib.
Aprelin 11-də İslamabadda İran və ABŞ arasında bir neçə raund danışıqlar aparılıb. İran nümayəndə heyətinə parlament sədri Məhəmməd Baqer Qalibaf, ABŞ nümayəndə heyətinə isə vitse-prezident Cey Di Vens rəhbərlik edib. Hər iki tərəfin sonradan verdiyi məlumata görə, bir sıra ziddiyyətlər səbəbindən münaqişənin uzunmüddətli nizamlanmasına dair razılıq əldə olunmayıb. ABŞ aprelin 13-dən etibarən İrana qarşı dəniz blokadası tətbiq edib.
Musavat.com
