Dondurulmuş qidalar çox vaxt ürək üçün zərərli sayılır, çünki onların bir çoxu emal olunmuş olur və yüksək miqdarda natrium ehtiva edir. Natriumun həddindən artıq qəbulu arterial təzyiqin yüksəlməsinə, ürək-damar xəstəlikləri və insult riskinin artmasına səbəb ola bilər...
Poliqon Very Well Health-a istinadən xəbər verir ki, ürək üçün faydalı pəhrizdən danışarkən bütün dondurulmuş məhsulları istisna etmək düzgün deyil.
Qaragilə - Dondurulmuş qaragilə haqlı olaraq superqida sayılır. Bu kiçik giləmeyvələr ürək üçün faydalı olan polifenollarla zəngindir. Bu maddələr antioksidant xüsusiyyətlərə malikdir. Araşdırmalar göstərir ki, qaragilə qan damarlarının daxili qatının normal fəaliyyətini dəstəkləyərək onların sərtləşməsinin qarşısını ala bilər. Eyni zamanda iltihabı azaldır və bağırsaq sağlamlığını dəstəkləyir.
Çiyələk - Dondurulmuş çiyələk də ürək üçün faydalıdır. Tədqiqatlar göstərir ki, çiyələk istehlakı sistolik arterial təzyiqi azalda bilər. Alimlər hesab edirlər ki, çiyələyin ürəyə müsbət təsiri onun tərkibindəki polifenollarla bağlıdır. Bu maddələr oksidləşdirici stressi və iltihabı azaldır.
Somon - Somon tərkibindəki omeqa-3 yağ turşularına görə ürək üçün son dərəcə faydalıdır və onu 9 aya qədər dondurulmuş halda saxlamaq mümkündür. Araşdırmalar göstərir ki, xüsusilə yağlı balıqların müntəzəm istehlakı ürək sağlamlığını yaxşılaşdırır. Bu, işemik ürək xəstəliyi və ondan ölüm riskinin azalması ilə əlaqələndirilir. Omeqa-3 yağ turşuları “pis” xolesterinin səviyyəsini və qan təzyiqini aşağı sala bilər.
Forel - Forel də omeqa-3 yağ turşuları ilə zəngin olan digər faydalı balıq növüdür. Onu file şəklində alıb dondurucuda saxlamaq rahatdır.
İspanaq - Yarpaqlı yaşıl tərəvəzlər, xüsusilə ispanaq qida nitratları ilə zəngindir. Orqanizmdə bu maddələr azot oksidinə çevrilir ki, bu da arterial təzyiqi və ürək xəstəlikləri riskini azalda bilər. İspanaq aşağı kalorili olsa da, lif, fol turşusu, A, C və K vitaminləri kimi qida maddələri ilə zəngindir.
Lima lobiyası - Lima lobiyası yumşaq dadı ilə seçilən paxlalı bitkidir. Ümumilikdə paxlalılar ürək üçün çox faydalıdır. Onlar lif və zülalla zəngin, xolesterin və doymuş yağ baxımından isə aşağı səviyyədədir.
Tofu - Tofu ürək üçün faydalı bitki mənşəli zülal mənbəyidir və dondurucuda rahat saxlanıla bilər. Dondurulma zamanı onun teksturası dəyişir və daha xırtıldayan olur. Araşdırmalar göstərir ki, soya ilə zəngin qidalanma, o cümlədən tofu istehlakı ürək-damar xəstəlikləri riskini azalda bilər.
Brokoli - Brokoli həm ümumi sağlamlıq, həm də ürək üçün çox faydalı dondurulmuş tərəvəzdir. Xaççiçəklilər ailəsinə aid olan bu tərəvəzlər arterial təzyiqin və xolesterinin azalması ilə əlaqələndirilir. Brokoli lif və antioksidantlarla zəngindir, iltihabəleyhinə xüsusiyyətlərə malikdir və bu xüsusiyyətlər ürək sağlamlığını dəstəkləyir.
Hinduşka əti - Mütəxəssislər ürək sağlamlığını qorumaq üçün qırmızı ət əvəzinə yağsız ət, xüsusilə quş ətinin seçilməsini tövsiyə edirlər. Hinduşka zülalla zəngindir, az yağlıdır və B qrupu vitaminləri, həmçinin sink, maqnezium, kalium, dəmir və fosfor kimi minerallarla təmin edir.
Poliqon.info
