Birləşmiş Ərəb Əmirlikləri (BƏƏ) İranla mümkün hərbi qarşıdurma ssenarisinə qarşı iqtisadi hazırlıq tədbirlərini gücləndirir. “The Wall Street Journal” məlumatına görə, Əmirliklər artıq ABŞ ilə maliyyə dəstəyi və valyuta likvidliyi üzrə danışıqlara başlayıb.

Müzakirələrin əsas mövzusu ABŞ Maliyyə Nazirliyi ilə valyuta svop xətti yaradılmasıdır. Bu addım mümkün böhran zamanı BƏƏ iqtisadiyyatının sabitliyini qorumağa yönəlib.

Qeyri-rəsmi məlumatlara görə, regionda gərginliyin artması halında investor axınının zəifləməsi, valyuta ehtiyatlarına təzyiq və Hörmüz boğazı üzərindən enerji daşımalarında risklər ciddi narahatlıq yaradır.

Maliyyə analitikləri bildirir ki, hələlik bu proses rəsmi müraciət mərhələsinə keçməyib və daha çox qabaqlayıcı iqtisadi strategiya kimi qiymətləndirilir. Bununla yanaşı, dollar likvidliyi problemi yaranacağı təqdirdə alternativ valyutalara, o cümlədən yuan istiqamətinə yönəlmə ehtimalı da gündəmdədir.

Qlobal ekspertlər hesab edir ki, Körfəz regionunda gərginliyin artması artıq yalnız hərbi-siyasi deyil, həm də qlobal maliyyə və enerji sisteminə birbaşa təsir edən faktor kimi formalaşır.

BƏƏ-nin atdığı addımlar regionda mümkün eskalasiyanın iqtisadi nəticələrinə qarşı erkən müdafiə strategiyası kimi qiymətləndirilir.

• Müharibə
• Risklər
• Körfəz Regionu
• Iqtisadi Hazırlıq