Tehran mümkün yeni qarşıdurma ssenarisi üçün hazırlıqları tamamlayıb və bu dəfə fərqli addımlar atmağa hazır olduğunu göstərib...
İran ABŞ və İsraillə mümkün yeni hərbi qarşıdurmanın yenidən başlaması ehtimalını ciddi şəkildə nəzərdən keçirdiyini açıqlayıb. Məlumata görə, Tehran danışıqların uğursuzluqla nəticələnəcəyi təqdirdə müharibənin yenidən alovlana biləcəyini istisna etmir və bu ssenariyə uyğun şəkildə əlavə hazırlıqlar görüb.
Poliqon xəbər verir ki, bu barədə Tasnim Agentliyi məlumat yayıb.
Bildirilib ki, İran son günlərdə bölgədəki vəziyyəti, xüsusilə də Vaşinqtonun sərt tələblərini və hərbi təzyiq elementlərini nəzərə alaraq, mümkün yeni mərhələ üçün strateji planlarını yeniləyib. Tasnim-in yaydığı informasiyaya əsasən, bu hazırlıqlar yalnız müdafiə xarakterli tədbirlərlə məhdudlaşmır, eyni zamanda qarşı tərəf üçün “yeni sürprizlər” də nəzərdə tutulur.
Məlumatda qeyd olunur ki, Tehran son iki həftə ərzində müharibənin yenidən başlanması ehtimalını yüksək qiymətləndirib. Bu çərçivədə müəyyən hərbi yerdəyişmələr həyata keçirildiyi, yeni hədəf siyahılarının hazırlandığı və mümkün hücum ssenarilərinə qarşı cavab mexanizmlərinin formalaşdırıldığı bildirilir. İran tərəfi bununla göstərməyə çalışır ki, əvvəlki qarşıdurmadan fərqli olaraq, yeni mərhələyə daha hazırlıqlı daxil olmağa çalışır.
Tasnim-in məlumatı regionda gərginliyin azalmadığını, əksinə, diplomatik prosesin taleyindən asılı olaraq daha təhlükəli mərhələyə keçə biləcəyini göstərir. Xüsusilə ABŞ ilə İran arasında aparılan mümkün təmasların nəticəsiz qalması halında, Yaxın Şərqdə yenidən genişmiqyaslı hərbi risklərin aktuallaşa biləcəyi ehtimalı artır.
Beləliklə, Tehran öz mesajında həm hərbi hazırlığını, həm də psixoloji təzyiq imkanlarını ön plana çıxarmağa çalışır. “Yeni sürprizlər” ifadəsi isə İranın mümkün növbəti qarşıdurmada əvvəlkindən fərqli taktiki və ya operativ addımlar ata biləcəyinə işarə kimi qiymətləndirilir.
Poliqon.info
