Cənubi Livanda atəşkəs yenidən pozulur, tərəflər bir-birini ittiham edir...
Poliqon xəbər verir ki, Hizbullah İsrail ordusunun Cənubi Livandakı mövqelərinə hücum etdiyini bəyan edib. Qruplaşmanın yaydığı məlumata görə, Livanın cənubundakı Taybə kəndində İsrail hərbçilərinə zərbə endirilib, eyni zamanda Məcdəl-Zun bölgəsində pilotsuz uçuş aparatı vurulub.
Bundan əvvəl İsrail Müdafiə Qüvvələri Cənubi Livanda “hava hədəfi”nin ələ keçirildiyini açıqlamışdı. Tərəflərin bir-birinə zidd bəyanatları bölgədə gərginliyin yenidən artdığını göstərir.
“Hizbullah” bildirib ki, çərşənbə axşamı bərpa olunan hücumlar İsrail tərəfindən 10 günlük atəşkəs rejiminin pozulmasına cavab xarakteri daşıyır. Qruplaşmanın iddiasına görə, ötən cümə qüvvəyə minən razılaşmadan sonra İsrail ordusu demək olar ki, hər gün Livanın cənubuna zərbələr endirib.
İsrail isə əksinə, “Hizbullah”ı atəşkəsi pozmaqda ittiham edir və sərhəd təhlükəsizliyinə qarşı təhdidlərə cavab verdiyini bildirir. Bu qarşılıqlı ittihamlar bölgədə əldə olunmuş kövrək sakitliyin uzunmüddətli olmayacağını göstərir.
Livan mənbələrinin məlumatına görə, son saatlarda İsrail hərbçiləri Cənubi Livandakı Kantra kəndində bir neçə binanı partladıblar. Hadisə nəticəsində dağıntıların miqyası və mümkün itkilərlə bağlı rəsmi məlumat verilməyib.
Poliqon.info
