Qızıl və ya gümüş bəzək əşyası seçərkən alıcıların çoxu yüksək probun daha yaxşı keyfiyyət rəmzi olduğunu düşünür. Lakin zərgərlik sahəsində bu yanaşma hər zaman özünü doğrultmur. Çünki metalın tərkibində təmiz qızılın payı artdıqca onun gündəlik istifadəsi çətinləşə bilər.
Zərgərlik mütəxəssisi Janna Semkina bildirir ki, prob metalın ərintidəki təmizlik dərəcəsini göstərir. Məsələn, 585 əyarlı qızılın tərkibinin 58,5 faizi təmiz metaldan, qalan hissəsi isə liqatura adlanan qatqılardan ibarətdir. Gümüşdə də bənzər prinsip keçərlidir. Mis, gümüş və ya palladium kimi əlavələr məhz məmulatın rəngini, möhkəmliyini və aşınmaya davamlılığını müəyyən edir.
Yüksək prob metalın daha yumşaq olması deməkdir. 750 və daha yuxarı əyarlı qızıl məmulatları, həmçinin tərkibində 96 faizdən çox təmiz metal olan gümüşlər tez cızılır və formasını itirir. Bu səbəbdən gündəlik taxılan üzüklər və qolbaqlar üçün nisbətən aşağı problar daha praktik hesab olunur. Qatqılar sayəsində metal bərkiyir və xarici görünüşünü uzun müddət qoruyub saxlayır.
Vizual cəhətdən yüksək prob daha parlaq və zəngin rəng verir. Məsələn, 999 əyarlı qızıl parlaq sarı rəngi ilə seçilir. Lakin bəzək əşyasının ümumi cəlbediciliyi təkcə rəqəmlərdən deyil, həm də dizayn və emal üsulundan asılıdır.
Mütəxəssis qızıl üçün 585, gümüş üçün isə 925 əyarı ideal balans hesab edir. Bu göstəricilər həm lazımi parıltını təmin edir, həm də zədələrə qarşı davamlı olur. Daha yüksək problar isə adətən xüsusi tədbirlər üçün nəzərdə tutulan bəzəklərdə və ya investisiya məqsədilə alınan külçələrdə özünü doğruldur.//Demokrat.az
