ABŞ-nin keçmiş dövlət katibinin müavini Vaşinqtonun ciddi diplomatiyaya qayıtmalı olduğunu bildirib…
Poliqon xəbər verir ki, bu barədə Vendi Şerman Bloomberg Agentliyinə müsahibəsində bildirib. Müsahibəsində ABŞ-nin keçmiş dövlət katibi müavini İran ətrafında yaranmış böhranın getdikcə daha təhlükəli xarakter aldığını və onun sadə hərbi həll yolunun olmadığını deyib.
Şermanın sözlərinə görə, hazırkı vəziyyət 2015-ci il nüvə sazişi üzrə aparılan danışıqlar dövründən daha mürəkkəbdir. O qeyd edib ki, İran daha sərt mövqe tutur, regionda gərginlik isə kəskin şəkildə artıb.
“Bu, daha mürəkkəb, daha təhlükəli və strateji baxımdan yanlış hesablanmış vəziyyətə çevrilib”, deyə Şerman Vaşinqtonun İranla bağlı hazırkı kursunu şərh edərkən bildirib.
Keçmiş diplomat vurğulayıb ki, ABŞ istənilən halda ciddi diplomatiyaya qayıtmalı olacaq. Onun fikrincə, bu cür böhranları qısa müddətdə və ya yalnız təzyiq vasitəsilə həll etmək mümkün deyil.
Şerman əlavə edib ki, İran özünü ABŞ təzyiqi qarşısında kapitulyasiyaya hazır tərəf kimi görmür. Onun sözlərinə görə, Hörmüz boğazı ətrafındakı vəziyyət qarşılıqlı qarşıdurmanı və hər iki tərəf üçün riskləri daha da artırır.
“Bunu tez etmək mümkün deyil. Bu, ekspertlər və uzunmüddətli diplomatiya tələb edən mürəkkəb danışıqlardır”, deyə ABŞ-nin keçmiş dövlət katibi müavini bildirib.
Şerman həmçinin qeyd edib ki, Hörmüz boğazından gəmilərin hərəkətini bərpa etmək mümkün olsa belə, böhran artıq regiondakı strateji vəziyyəti dəyişib. Onun fikrincə, İran indi boğaz üzərində nəzarətdən mühüm təzyiq vasitəsi kimi istifadə edə biləcəyinə inanır.
Poliqon.info
