Tehran İslamabadın neytral mövqe tutmadığını və Vaşinqtonun maraqlarını nəzərə aldığını iddia edir…
Poliqon xəbər verir ki, İran parlamentinin üzvü Ebrahim Rezai Pakistanın ABŞ ilə mümkün danışıqlarda vasitəçi roluna uyğun olmadığını bildirib. Onun sözlərinə görə, Pakistan dost və qonşu ölkə olsa da, bu prosesdə lazımi neytrallığa və etibara malik deyil.
Rezai qeyd edib ki, vasitəçi tərəf balanslı mövqe nümayiş etdirməlidir, lakin Pakistanın yanaşması bunu təmin etmir. O iddia edib ki, İslamabad daim ABŞ Prezidenti Donald Tramp administrasiyasının maraqlarını nəzərə alır və Vaşinqtonun mövqeyinə zidd açıqlamalar verməkdən çəkinir.
Deputatın sözlərinə görə, Pakistan ABŞ-nin əvvəlcə bəzi təklifləri qəbul edib, daha sonra isə onlardan imtina etməsi kimi məqamları açıq şəkildə dilə gətirmir. O həmçinin iddia edib ki, ABŞ-nin Livanla bağlı öhdəlikləri və dondurulmuş aktivlər məsələsində verdiyi vədlər yerinə yetirilməyib, lakin bu barədə də açıq danışılmır.
Rezai vurğulayıb ki, real vasitəçi tərəf neytral olmalı və tərəflərdən birinin mövqeyinə daim üstünlük verməməlidir. Onun fikrincə, bu xüsusiyyətlər Pakistanın hazırkı davranışında müşahidə olunmur.
Poliqon.info
