İranın “Qüds” qüvvələrinin komandanı İsmayıl Kaani “Hizbullaha” dəstək mesajı göndərib, İsrailin Livanın müqavimət potensialının məhv edilməsi ilə bağlı iddialarını yalanlayıb, regiondakı müttəfiqlərin yüksək koordinasiyasını vurğulayıb…
Poliqon xəbər verir ki, İran İslam İnqilabı Keşikçiləri Korpusunun (İİKK) “Qüds” qüvvələrinin komandanı İsmayıl Kaani rəsmi müraciətində Livanın “Hizbullah” hərəkatına dəstək ifadə edib və regiondakı mövcud vəziyyəti şərh edib.
General Kaani İsrailin Livanın müqavimət potensialının ləğv edilməsi ilə bağlı açıqlamalarını etibarsız adlandıraraq, bu iddiaları qətiyyətlə rədd edib. O, İsrail və onun müttəfiqlərinin genişmiqyaslı hərbi və maliyyə iştirakına baxmayaraq, İsrail əməliyyatının qarşıya qoyulan məqsədlərinə nail olmadığını vurğulayıb.
Kaani qeyd edib ki, “müqavimət cəbhəsi” adlanan regional qüvvələr yüksək səviyyədə koordinasiya və birlik nümayiş etdirirlər. O əlavə edib ki, İsraildən münaqişənin daha da gərginləşməsi halında bu strukturlar Livan və Fələstin tərəflərinə lazımi dəstək verməyə hazırdırlar.
Komandan bəyanatında vurğulayıb ki, “müqavimət oxu” İsrailin hərbi və siyasi təzyiqlərinə baxmayaraq, getdikcə daha da güclənir və regionda strateji tarazlığın qorunmasında mühüm rol oynayır. Kaani həmçinin “Hizbullah”ın hazırki münaqişədə göstərdiyi dözüm və mübarizə əzmini yüksək qiymətləndirib.
Poliqon.info
