Afrika Korpusundan olan rus muzdluları Malidəki beş illik hərbi mövcudluqları ərzində ən ağrılı məğlubiyyətlərdən birini yaşayıb.
Tuareq üsyançıları və Əl-Qaidə ilə əlaqəli bir qrupun yaraqlılarının koordinasiyalı hücumu muzdluları Kidal şəhərindən geri çəkilməyə məcbur edib.
2023-cü ildə Mali ordusu ilə birlikdə şəhərin nəzarətini ələ keçirmək Assimi Qoytanın ölkədəki hərbi xuntasını dəstəkləyən muzdluların əsas hərbi uğurlarından biri idi. BBC mənbələrinə görə, sonuncunun Mali lideri kimi gələcəyi indi qeyri-müəyyən görünür. Həftəsonu Tuareq üsyançıları Malidəki cihadçılarla koordinasiyalı şəkildə 2021-ci ildən bəri ölkədə hakimiyyətdə olan xuntaya qarşı ən böyük hücumlardan birini həyata keçirib və açıq şəkildə əməkdaşlıq etdiklərini bildirib.
Müdafiə naziri general-leytenant Sadio Kamara şənbə günü paytaxt Bamakodan 15 kilometr şimalda, xuntanın əsas hərbi bazasının yerləşdiyi Kati şəhərində döyüşdə həlak olub. Malinin şimalında ayrıca bir etnik dövlət qurmağa çalışan Tuareq separatçılarının hücumları əsasən şimal şəhərlərinə yönəlib, Əl-Qaidə ilə əlaqəli cihadçı qrup Cama'at Nusrat əl-İslam vəl-Müslimin (JNIM) isə ölkə daxilində bir neçə hədəfə hücumlar həyata keçirib.
Bamako və ətraf ərazilərdə vəziyyəti canlı izləyən üç BBC Rus Xidməti mənbəyi bildirib ki, paytaxt və ətraf ərazilər hazırda "nisbətən sakitdir, [hərbi] bazaların yaxınlığında atəş səsləri eşidilir", lakin bu, vəziyyətin yaxın gələcəkdə kökündən dəyişməyəcəyi anlamına gəlmir. Onlar bildiriblər ki, Bamakodakı hava limanı bağlıdır və ora aparan yol boyunca silahlı hökumət nəzarət məntəqələri mövcuddur.
SAMİRƏ
