Böyük Britaniyanın "Macdonald Hotels and Resorts" hotel şəbəkəsi yanacaq qiymətlərinin artımı fonunda səyahətçiləri dəstəkləmək məqsədilə yeni proqram başladığını elan edib...
Poliqon xəbər verir ki, Express nəşrinin yazdığına görə, təşəbbüs şəbəkənin 29 hotelində tətbiq olunur və ölkədaxili istirahəti seçən qonaqlar üçün yol xərclərinin qismən kompensasiyasını nəzərdə tutur.
Proqramın şərtlərinə əsasən, iştirakçı hotellərdə ən azı iki gecəlik rezervasiya edən qonaqlar yanacaq üçün 29 avroya qədər kompensasiya ala biləcəklər. Bəzi məkanlarda bu məbləğ 23 avro təşkil edir. Bundan əlavə, bəzi hotellər qonaqlara 29 avroya qədər yemək və içki üçün vauçer də təqdim edir.
Şəbəkənin kurort obyektləri üçün ayrıca şərtlər də mövcuddur: bu hallarda 29 avroluq yanacaq kompensasiyası dörd gecəlik rezervasiya zamanı verilir. Qısa səfərlər üçün isə sadələşdirilmiş paket təklif olunur – bir gecəlik qalma zamanı qonaqlar yemək və içki üçün kredit əldə edə bilərlər.
Şirkət bildirir ki, təşəbbüsün başlanması birbaşa Böyük Britaniyada yanacaq qiymətlərinin artması ilə bağlıdır. RAC avtomobil assosiasiyasının məlumatına görə, fevralın sonundan etibarən benzinin qiyməti təxminən hər litr üçün 30 avrosent, dizelin qiyməti isə təxminən 55 avrosent artıb. Bunun səbəblərindən biri Yaxın Şərqdəki gərginliyin qlobal enerji bazarlarına təsiridir.
Bu fonda britaniyalıların getdikcə daha çoxu xarici səfərlərdən imtina edərək ölkədaxili turizmə üstünlük verir. "Macdonald Hotels and Resorts" ümid edir ki, yeni proqram ailələr üçün maliyyə yükünü azaldacaq və daxili istirahəti daha əlçatan edəcək.
Proqram yalnız şəbəkənin rəsmi saytı vasitəsilə edilən rezervasiyalar üçün keçərlidir. Qonaqlar qalma müddəti başa çatdıqdan sonra 14 gün ərzində istifadə edə biləcəkləri yanacaq krediti üçün xüsusi QR-kod əldə edirlər. Şirkət bununla həm müştəriləri dəstəkləməyi, həm də birbaşa rezervasiyaları təşviq etməyi hədəfləyir.
Poliqon.info
