Böyük Britaniya Kralı III Çarlzla görüş zamanı ABŞ Prezidenti Donald Tramp hazırda Rusiya lideri Vladimir Putinlə dialoqda olduğunu bildirib.
“Cebhenfo.az” xəbər verir ki, danışığın təfərrüatları barədə dodaq oxuyucusu Nikola Hiklinqə istinadən, Britaniyanın “Daily Mail” qəzeti yazıb.
Qəzetin məlumatına görə, liderlər Ağ Ev iqamətgahının Cənub Çəmənliyində salamlaşıblar, bundan sonra Tramp 25 apreldə qatıldığı tədbirdə baş verən atışmadan danışıb.
Hiklinqin fikrincə, Britaniya Kralı buna cavab olaraq uzun müddət çəmənlikdə qalmamalı olduğunu qeyd edib. Daha sonra söhbət Ukraynadakı münaqişənin həlli mövzusuna keçib və Tramp məhz bu məqamda Rusiya Prezidenti Putinlə əlaqələrdən bəhs edib.
Ekspertin sözlərinə görə, III Çarlz mövzunu dəyişdirməyə çalışaraq Ukrayna məsələsinə daha sonra qayıtmağı təklif edib. Lakin Tramp məsələni davam etdirib və Kral böhranı başqa vaxt müzakirə etməyin daha yaxşı olacağını təkrarlamaq məcburiyyətində qalıb. Nəticədə söhbət Ağ Evin bal salonunun təmiri layihəsinə keçib.
Daha əvvəl, 26 apreldə Tramp “Fox News”-a verdiyi müsahibədə Putinlə əlaqə saxladığını qeyd etmişdi. Növbəti gün Rusiya Prezidentinin mətbuat katibi Dmitri Peskov jurnalistlərə bildirmişdi ki, Kreml dövlət başçısına amerikalı həmkarı ilə telefon danışıqları barədə müntəzəm olaraq məlumat verir.
Həmçinin bildirilib ki, London III Çarlzın Trampla Ağ Evdə görüşü zamanı kameralar olmamasına israr edib və 2025-ci ilin fevral ayında Ukrayna lideri Volodimir Zelenski ilə baş verən ssenarinin təkrarlanmasından ehtiyatlanıb. Mənbələrə görə, monarxın mətbuat qarşısına yalnız tədbirin əvvəlində çıxması planlaşdırılıb.
