Şimali Koreya ABŞ-ın raketdən müdafiə sistemini yararaq məhdud zərbə endirmək üçün kifayət qədər nüvə başlıqları və onların çatdırılma vasitələrinə malikdir...
Poliqon xəbər verir ki, bu barədə Bloomberg Cənubi Koreya prezidenti Li Ce Menin bəyanatına istinadən yazır.
Onun sözlərinə görə, Pxenyan hər il 20-yə qədər nüvə başlığı hazırlamaq üçün kifayət qədər nüvə materialı istehsal edə bilir. Bu temp saxlanılarsa, yaxın 10 ildə Şimali Koreyanın nüvə arsenalı Fransa səviyyəsinə çata bilər. İstehsal gücləri artırılarsa, bu göstərici daha da yüksələcək.
Qeyd olunur ki, Hwasong-15, Hwasong-17, Hwasong-18 və Hwasong-19 qitələrarası ballistik raketləri bu başlıqlarla təchiz olunaraq Şimali Koreyaya ABŞ-ın hazırkı orta mənzilli raketdən müdafiə sistemlərini aşmaq imkanı verir.
Bununla yanaşı, Pxenyanın ABŞ-ın Asiyadakı müttəfiqlərinə və regiondakı hərbi bazalarına, o cümlədən strateji əhəmiyyətli Quam adasına çata bilən çoxlu sayda qısa mənzilli raketləri də mövcuddur.
Ekspertlər bildirirlər ki, Şimali Koreya artıq yalnız nüvə müharibəsi ilə hədələməklə kifayətlənmir, belə bir münaqişəni başlatmaq imkanına da malikdir.
"Qarşınızda bir neçə il əvvəlkindən daha az ehtiyatlı davranacaq nüvə silahlı Şimali Koreya var", deyə Karnegi Beynəlxalq Sülh Fondunun baş elmi əməkdaşı Ankit Panda bildirib.
Ötən il ABŞ kəşfiyyatı Pxenyanın ABŞ ərazisinə çata bilən cəmi 10 raketə malik olduğunu qeyd etsə də, müstəqil analitiklər ölkənin təkcə buraxılış qurğularının sayının təxminən 50-yə yaxın ola biləcəyini bildirirlər.
Poliqon.info
