Beyrut – Livanda münaqişənin kəskinləşməsi ərzaq təhlükəsizliyi vəziyyətini ciddi şəkildə pisləşdirib. BMT-nin FAO və WFP təşkilatlarının dəstəyi ilə hazırlanan yeni IPC hesabatına görə, 2026-cı ilin aprel–avqust aylarında təxminən 1,24 milyon insan – əhalinin hər dörd nəfərindən biri – kəskin ərzaq çatışmazlığı (IPC Faza 3 və ya daha ağır) ilə üzləşəcək.
QHT.az xarici mediaya istinadən bildirir ki, vəziyyət ötən dövrlə müqayisədə ciddi şəkildə pisləşib. 2025-ci ilin sonundan 2026-cı ilin əvvəlinədək bu göstərici 874 min nəfər idi. Pisləşməyə əsas səbəblər münaqişə, köç, iqtisadi çətinliklər və ərzaq qiymətlərinin artmasıdır.
Hesabatda qeyd olunur ki, kənd təsərrüfatı sektoru ciddi zərər görüb, əkin sahələrinə çıxış məhdudlaşıb və istehsal azalıb. Ən ağır vəziyyət Bent Jbeil, Marjeyoun, Sour və Nabatiyeh bölgələrində müşahidə olunur.
Hazırda 725 min livanlı, 362 min suriyalı qaçqın və 104 min fələstinli qaçqın ərzaq böhranı riski altındadır. Yeni gəlmiş suriyalı köçkünlər arasında isə bu göstərici 52 faizə çatır.
