ABŞ-ın Avropada təxminən 80.000 hərbçisi var və bu kontingentin sayı və strukturu beynəlxalq vəziyyətdəki dəyişiklikləri əks etdirmək üçün daim tənzimlənir.
Musavat.com xəbər verir ki, bunu TASS-a ABŞ Avropa Komandanlığının (EUCOM) sözçüsü deyib:
"Hazırda Avropa Əməliyyatlar Zonasında təxminən 80.000 ABŞ əsgəri var. Bunlardan təxminən 38.000-i Almaniyada daimi və rotasiyalı şəkildə yerləşdirilib".
O, Almaniyada bu qüvvələrin Visbaden, Reyn-Pfalts, Ştutqart və Bavariya ərazilərində yerləşdirildiyini qeyd edib: "Bu rəqəm daim, demək olar ki, aylıq olaraq dəyişir. Bu dalğalanmalar planlaşdırılmış təlimlər və qüvvələrin əməliyyat meydançasında rotasiyası ilə əlaqədardır. Biz daimi və müvəqqəti yerləşdirilən qüvvələrin kombinasiyasından təsir gücü kimi istifadə edərək, şərait dəyişdikcə qüvvələrimizin və aktivlərimizin strukturunu və ölçüsünü daim nəzərdən keçirir və tənzimləyirik". Onun sözlərinə görə, bu məsələ ilə bağlı qərarlar Vaşinqton tərəfindən Şimali Atlantika Müqaviləsi Təşkilatı (NATO) tərəfdaşları ilə məsləhətləşmələr əsasında qəbul edilir: "Biz həmçinin müvafiq kollektiv çəkindirmə və müdafiə qüvvələrinin strukturunu və gücünü təmin etmək üçün NATO müttəfiqləri ilə sıx məsləhətləşmələr aparırıq. Müttəfiqlərimiz kollektiv çəkindirmə və müdafiə qabiliyyətimizi təmin etmək üçün öz qüvvələrini və imkanlarını təqdim edirlər".
Musavat.com
