...Avropa Birliyi (AB) yüksək toksiklik və həyati təhlükə yaradan təsirlərə görə kosmetika sənayesində 15 kimyəvi maddənin istifadəsini qadağan edir.
SİA xəbər verir ki, bu barədə New York Post qəzeti yazır. Deməli, yeni qaydalar 1 may tarixindən qüvvəyə minib. Siyahıya bir neçə kateqoriyada təhlükəli kimi tanınan maddələr daxildir.Bu birləşmələr kanserogen, mutagen və reprotoksik kimi təsnif edilir.
Bu maddələrin gözəllik və şəxsi qulluq məhsullarının istehsalında istifadəsi artıq qanunsuz hesab ediləcək, çünki onlar xərçəngə, DNT strukturunda dönməz dəyişikliklərə və sonsuzluğa səbəb ola bilər.
Ətraf Mühit üzrə İşçi Qrupunun baş elmi işçisi Aleksa Fridman vəziyyətlə bağlı şərh verib.
O, bu sahədə Avropa qanunvericiliyinin xüsusiyyətlərini izah edərək, AB-nin təhlükəli maddələrin müəyyən edilməsinə cavab vermək üçün avtomatlaşdırılmış bir prosesə sahib olduğunu qeyd edib.
…AB-də kimyəvi maddə CMR kimi təsnif edildikdə, o, avtomatik olaraq kosmetikada qadağan olunmuş maddələr siyahısına əlavə olunur, - Fridman deyib.
Ekspert həmçinin vurğulayıb ki, ABŞ-da hazırda istehlak mallarının istehsalında şübhəli kimyəvi maddələrin dərhal qadağan edilməsinə imkan verən oxşar hüquqi mexanizm yoxdur.
Əli Babayev
