Qoltuqaltı nahiyəyə tətbiq olunan dezodorantlarla bağlı diqqətçəkən xəbərdarlıq edilib. Xüsusilə təraşdan dərhal sonra istifadə bəzi risklər yarada bilər.
“Yeni Sabah” xəbər verir ki, mütəxəssislər qoltuqaltını təraş etdikdən dərhal sonra dezodorant istifadəsinin dəridə yaranan xırda kəsiklər səbəbilə bəzi kimyəvi maddələrin daha tez sorulmasına şərait yarada biləcəyini bildirirlər. Bu məhsulların tərkibində olan alüminium və paraben kimi maddələrin sağlamlığa təsiri isə hələ də müzakirə mövzusu olaraq qalır.
Qeyd olunur ki, limfa düyünləri məhz qoltuqaltına yaxın nahiyələrdə yerləşir və immun sisteminin mühüm hissəsidir. Bu səbəbdən dəri vasitəsilə sorulan maddələrin bu bölgə ilə qarşılıqlı təsiri ilə bağlı müxtəlif araşdırmalar aparılıb. Alüminium və parabenlərin estrogenə bənzər təsir göstərə biləcəyi iddia edilsə də, dezodorant istifadəsi ilə süd vəzi xərçəngi arasında birbaşa və dəqiq əlaqəni sübut edən güclü elmi faktlar hələlik mövcud deyil.
Bununla belə, mütəxəssislər dəri sağlamlığını qorumaq üçün sadə tədbirlərin görülməsini tövsiyə edirlər. Təraşdan sonra dezodorant tətbiq etməzdən əvvəl dərinin sakitləşməsi üçün 20-30 dəqiqə gözləmək faydalı hesab olunur.
Həmçinin, həssas dərilər üçün nəzərdə tutulmuş və daha sadə tərkibli məhsullara üstünlük vermək məsləhətdir. Məhsulun tərkibi barədə məlumatlı olmaq isə daha düzgün və şüurlu seçim etməyə imkan yaradır.
Aytac Əliyeva
Telegram kanalımız
