Bizimyol saytından alınan məlumatlara görə, ain.az xəbər verir.
Hindistan və Nepal arasında Tibetdə yerləşən müqəddəs Kaylaş dağı və Mansarovar gölünə aparan zəvvar marşrutu ətrafında yeni sərhəd mübahisəsi yaranıb. Liphulekh keçidi üzərindən keçən yol iki ölkə arasında diplomatik gərginliyi yenidən artırıb və tərəflər bu məsələ ilə bağlı bəyanatlar mübadiləsi aparıblar.
Bizimyol.info xəbər verir ki, Nepal hökuməti həm Hindistana, həm də Çinə diplomatik nota göndərərək Liphulekh keçidi vasitəsilə təşkil edilən ziyarətlərə etirazını bildirib. Katmandu bu ərazinin Nepalın suverenliyinə aid olduğunu iddia edir. Nepal Xarici İşlər Nazirliyinin sözçüsü Lok Bahadur Paudel Çhetri ölkənin narahatlığının diplomatik kanallarla hər iki qonşuya çatdırıldığını deyib.
Nepal tərəfi 1816-cı il Sugauli müqaviləsinə istinad edərək Limpiadxura, Liphulekh və Kalapani bölgələrinin Nepal ərazisinin ayrılmaz hissəsi olduğunu vurğulayıb. Katmandu Hindistana bu bölgədə yol tikintisi, sərhəd ticarəti və ziyarətlərin təşkili də daxil olmaqla hər hansı fəaliyyət göstərməmək çağırışı edib.
Hindistan Xarici İşlər Nazirliyinin sözçüsü Randhir Cayisval isə Nepalı cavablandıraraq Dehlinin mövqeyini bir daha xatırladıb. O bildirib ki, Hindistanın fikrincə, bu cür ərazi iddiaları tarixi faktlara və sübutlara əsaslanmır və “tək tərəfli şəkildə sərhədlərin genişləndirilməsi cəhdləri əsassızdır”.
Cayisval qeyd edib ki, Liphulekh keçidi 1954-cü ildən bəri Kaylaş və Mansarovar ziyarətləri üçün ənənəvi marşrut kimi istifadə olunur və bu, yeni bir məsələ deyil. O əlavə edib ki, Hindistan Nepal ilə bütün ikitərəfli məsələlər üzrə dialoq və diplomatiya yolu ilə konstruktiv əməkdaşlığa açıqdır.
Qeyd olunur ki, bu marşrut 2025-ci ildə beş illik fasilədən sonra yenidən açılıb. 2026-cı il üçün isə iyun–avqust aylarında Liphulekh keçidi vasitəsilə ümumilikdə 10 zəvvar qrupunun səfəri planlaşdırılır və hər qrupda 50 nəfərin olması nəzərdə tutulur.
Bizimyol.info
Ən son xəbərləri və yenilikləri almaq üçün ain.az saytını izləyin.
