ABŞ Prezidenti Donald Tramp Hörmüz boğazında gəmilərin azad edilməsi üçün “Azadlıq Layihəsi” adlı humanitar əməliyyat elan edib. O bildirib ki, sözügedən gəmilər münaqişə ilə bağlı deyil və şəraitin qurbanına çevriliblər.
Bizim.Media xəbər verir ki, Tramp əlavə edib ki, maneə yaradılacağı təqdirdə ABŞ güc tətbiq edə bilər.
CENTCOM isə əməliyyata 15 mindən çox hərbçinin, idarəolunan raketlərlə təchiz edilmiş esmineslərin, 100-dən çox təyyarənin və çoxməqsədli dronların cəlb ediləcəyini açıqlayıb.
Avropa İttifaqı Böyük Britaniyadan Aİ-nin ümumi bazarına çıxış üçün illik 1,15 milyard avro ödəniş tələb edib. Londonun Aİ ilə daha sıx əməkdaşlığı çərçivəsində bu ödəniş məsələsi mayın 4-də İrəvanda keçiriləcək Avropa Siyasi Birliyinin sammitində müzakirə olunacaq mövzulardan biri olacaq. Qeyd edilir ki, Aİ üzvü olmayan İsveçrə 2025-ci ildə ümumi bazara çıxış üçün Aİ-nin Birləşmə Fonduna 375 milyon avro ödəməyə razılaşıb.
Moskvada “Mosfilmovskaya küçəsindəki ev” adlı elit yaşayış kompleksində partlayış baş verib. İlkin versiyaya görə, buna dron zərbəsi səbəb ola bilər. Binanın fasadı zədələnib, şüşələr sınıb, qəlpələr binanın həyətinə düşüb. Moskva meri Sergey Sobyaninin sözlərinə görə, xəsarət alan yoxdur. Hadisə yerində təcili xidmətlər işləyir.
Böyük Britaniyanın Dəniz Ticarəti Əməliyyatları Agentliyi BƏƏ sahilləri yaxınlığında tankerin atəşə tutulduğunu bildirib. Məlumata görə, gəmi Hörmüz boğazında naməlum mərmilərlə vurulub. Ekipaj təhlükəsiz vəziyyətdədir, ətraf mühitə zərər dəyməyib.
ABŞ-ın Oklahoma ştatında, Edmond şəhəri yaxınlığındakı Arkadiya gölü ərazisində yerləşən düşərgədə kütləvi atışma baş verib.
İlkin məlumata görə, 4-dən 15-dək insan yaralanıb. Hadisə yerinə təcili xidmətlər cəlb olunub. Polis odlu silah yarası alan şəxsləri aşkarlayıb, insidentin səbəbləri araşdırılır.
İspaniyanın Baş naziri Pedro Sançesin təyyarəsi Madriddən İrəvana uçarkən texniki nasazlıq səbəbindən Ankarada məcburi eniş edib. Nümayəndə heyətinin bu gün Ermənistana səfərinin davam edəcəyi gözlənilir.
ABŞ mayın 3-də Tehrana müharibənin dayandırılması ilə bağlı sazişin daha bir dəyişdirilmiş layihəsini təqdim edib. Bildirilir ki, sənəd İran rəsmilərinin son təklifinə cavab olaraq göndərilib.
Türkiyənin Uşak vilayətində Uşak-İzmir magistral yolunda 7 nəqliyyat vasitəsinin, o cümlədən sərnişin avtobusunun iştirakı ilə zəncirvari qəza baş verib. Nəticədə 4 nəfər ölüb, 34 nəfər yaralanıb.
Özbəkistanın xarici işlər naziri Bəxtiyor Saidov Körfəz Ərəb Dövlətləri Əməkdaşlıq Şurasının baş katibi Casim Məhəmməd əl-Budeyvi ilə görüşüb. Tərəflər qarşıdakı birgə tədbirlərə hazırlığı, həmçinin ticarət, iqtisadiyyat və nəqliyyat sahələrində praktiki təşəbbüsləri müzakirə ediblər.
Rusiya Yaxın Şərqdə nüvəsiz zona yaradılması ilə bağlı yeni təşəbbüslərin mümkünlüyünü istisna etməyib.
Bu barədə Rusiyanın Vyanadakı beynəlxalq təşkilatlar yanında daimi nümayəndəsi Mixail Ulyanov bildirib. Onun sözlərinə görə, bu mövzu ideya tam reallaşana qədər beynəlxalq gündəmdə qalacaq və Moskva ehtiyac yaranacağı təqdirdə əlavə təkliflərlə çıxış edə bilər.
Ulyanov əsas maneə kimi İsrailin mövqeyini göstərib. Onun sözlərinə görə, İsrail Nüvə Silahlarının Yayılmaması Müqaviləsinə qoşulmur və belə bir zonanın yaradılmasında iştiraka hazır olduğunu nümayiş etdirmir.
Bizim.Media
