Krallıq Hörmüz boğazından asılılığı azaltmaq üçün alternativ ticarət marşrutları formalaşdırmağa çalışıb...
Poliqon xəbər verir ki, Financial Times nəşrinin məlumatına görə, Səudiyyə Ərəbistanı Qırmızı dəniz sahillərində yerləşən “Neom” limanını Fars körfəzi ölkələrini Avropa və Afrika ilə birləşdirən əsas nəqliyyat qovşağı kimi tanıtmağa başlayıb.
Məlumata görə, krallıq uzun illər diqqətdən kənarda qalan Qırmızı dəniz sahilinə strateji ticarət marşrutu kimi yanaşır. Bu addım İran tərəfindən Hörmüz boğazı üzərində nəzarətin yaratdığı riskləri balanslaşdırmaq məqsədi daşıyır.
Bildirilir ki, vəliəhd şahzadə Məhəmməd bin Salman tərəfindən irəli sürülmüş “Neom” meqalayihəsi ilkin mərhələdə futuristik şəhər konsepsiyası ilə diqqət çəksə də, xərclərin ciddi şəkildə artması səbəbindən layihə əhəmiyyətli dərəcədə ixtisar edilib. Buna baxmayaraq, hazırda layihənin liman infrastrukturu ön plana çıxarılaraq alternativ iqtisadi həll kimi təqdim olunur.
“Neom” komandası sosial şəbəkədə bildirib ki, qlobal ticarət marşrutlarının dəyişdiyi və regional dinamikanın yenidən formalaşdığı şəraitdə liman artıq daha sürətli və inteqrasiya olunmuş ticarət imkanları təqdim edir və Qırmızı dənizdə strateji mövqeyi sayəsində mühüm qapıya çevrilir.
Ekspertlər hesab edir ki, layihənin əvvəlki iddialı şəhər konsepsiyası mübahisəli sayılsa da, onun daha az diqqət çəkən infrastruktur komponentləri, xüsusilə liman, mövcud geosiyasi şəraitdə real fayda verə bilər. Sage Beynəlxalq Münasibətlər İnstitutunun icraçı direktoru Elana Delozye bildirib ki, “Neom” ilkin olaraq Hörmüz boğazı ilə bağlı risklərə qarşı nəzərdə tutulmasa da, hazırda bu istiqamət prioritetə çevrilə bilər.
Analitiklər vurğulayır ki, regionda artan gərginlik və dəniz ticarətinə yönələn təhlükələr fonunda alternativ marşrutların inkişafı qlobal enerji və logistika təhlükəsizliyi baxımından getdikcə daha böyük əhəmiyyət kəsb edir.
Poliqon.info
