Almaniya hökuməti 2027-ci il federal büdcə layihəsi çərçivəsində inkişaf nazirliyinin (BMZ) büdcəsində 582 milyon avro (təxminən 680 milyon dollar) ixtisar etməyi planlaşdırır. Bu qərar Berlinin xarici yardım siyasətini yenidən qurması və resursları daha çox geosiyasi prioritetlərə yönəltməsi fonunda qəbul edilib.
QHT.az xarici mediaya istinadən bildirir ki, Almaniya hazırda dünyada rəsmi inkişaf yardımı (ODA) verən ölkələr arasında ABŞ-i geridə qoyaraq birinci yerdədir. Lakin ölkə artıq yardımları daha çox qrantlar (geri qaytarılmayan vəsaitlər) deyil, kreditlər (borc şəklində verilən vəsaitlər) vasitəsilə həyata keçirməyi planlaşdırır. Ekspertlərin fikrincə, bu dəyişiklik ümumi yardım məbləğini kağız üzərində qoruyub saxlaya bilər, amma yardımın xarakterini dəyişdirəcək.
Beynəlxalq göstəricilərə görə, Almaniyanın dövlət xərclərinin cəmi təxminən 1 faizi inkişaf yardımına gedir. Lakin aparılan sorğular göstərir ki, Almaniya ictimaiyyəti bu rəqəmi xeyli şişirdir və orta hesabla insanların çoxu dövlət büdcəsinin təxminən 12 faizinin yardım üçün istifadə olunduğunu düşünür.
Mütəxəssislər xəbərdarlıq edirlər ki, əgər digər ölkələr də öz yardım siyasətlərini dəyişsələr, Almaniyanın dünya üzrə birinci donor mövqeyi təhlükə altına düşə bilər. Bu isə qlobal inkişaf yardımlarının ümumi strukturunda ciddi dəyişikliklərə səbəb ola bilər.
