Avropa İttifaqı İranla davam edən müharibənin turizm və aviasiya sektorundakı təsirlərinin hələlik pandemiya səviyyəsində bir böhrana yol açmadığını bildirərək, şirkətlərin gözlədiyi təcili dəstək paketlərinə razılıq verməyib.
AFN.az xəbər verir ki, Avropa Komissiyası tərəfindən cümə günü dərc olunması gözlənilən təlimat layihəsi aviasiya sektorunun üzləşdiyi çətin şərtlərə baxmayaraq Avropa İttifaqının mövcud vəziyyəti necə qiymətləndirdiyini ortaya qoyub.
"Reuters" agentliyinin əldə etdiyi sənədlərə görə, Aİ turizm və aviasiya sektorunun hazırkı durumunu qlobal uçuşların tamamilə dayandığı COVID-19 böhranı ilə bərabər tutmur.
Komissiya müharibənin təsirlərinin hiss olunmasına rəğmən bu mərhələdə sektor üçün xüsusi və genişmiqyaslı bir dəstək paketinin tətbiqinə ehtiyac olmadığı qənaətindədir.
İranla yaşanan qarşıdurmalar qlobal bazarları sarsıdarkən, investorlar arasında neft qiymətlərindəki kəskin artımın inflyasiyanı stimullaşdıracağı narahatlığı hakimdir.
Müharibə başladığı gündən bəri təyyarə yanacağının bir barelinin qiymətinin 100 dolları keçməsi aviaşirkətləri iqtisadi baxımdan çətin vəziyyətə salıb. Şirkətlər xərclərin artması ilə yanaşı, yanacaq tədarükündə yarana biləcək mümkün qıtlığın yay mövsümündə uçuşların ləğvinə səbəb olacağından ciddi narahatlıq keçirirlər.
Avropanın hava daşıyıcıları yanacaq xərclərindəki bu kəskin artım və qeyri-müəyyənlik mühitində çətin bir yaz və yay mövsümünə hazırlaşarkən, Brüsseldən gələn bu siqnallar sektordakı gözləntiləri doğrultmayıb.
Aİ rəhbərliyi iqtisadi nikbinliyin zəiflədiyini qəbul etsə də, sektoral müdaxilələr əvəzinə ümumi iqtisadi tarazlıqları izləməyə üstünlük verir. Bu vəziyyət artan əməliyyat xərcləri ilə tək qalan aviaşirkətlərin yaxın dövrdə öz strategiyalarına yenidən baxmasına səbəb ola bilər.
