Demokratiyalar Alyansı Fondunun illik sorğusunun məlumatlarına görə, ABŞ-yə qarşı qlobal münasibət ardıcıl ikinci ildir ki, pisləşib və indi bu ölkə Rusiyadan da aşağı pillədə yer alır.
Musavat.com xarici mediaya istinadla xəbər verir ki, ABŞ-yə qarşı xalis qavrayış, -100 faizdən +100 faizə qədər şkala üzrə, iki il əvvəlki +22 faizdən -16 faizə düşüb. Rusiyanın müvafiq göstəricisi -11 faizdir. Çin isə +7 faiz reytinq alıb. Hansı ölkənin sülhə təhlükə yaratdığı sualına cavab olaraq, ABŞ Rusiya və İsraildən sonra üçüncü yeri tutub.
"İmicimizin sürətlə pisləşməsi kədərlidir, amma təəccüblü deyil", - alyansın qurucusu və NATO-nun keçmiş baş katibi Anders Foq Rasmussen bildirib. Onun sözlərinə görə, Trampın son bir il yarım ərzindəki siyasəti transatlantik münasibətləri şübhə altına alıb və NATO üzvü olan bir dövlətin ərazisinə müdaxilə təhdidləri ilə müşayiət olunub.
Daha əvvəl ABŞ prezidenti Donald Trampın reytinqi neft qiymətlərinin dörd dəfə artması fonunda rekord həddə düşüb. Bu səbəbdən "The Financial Times" (FT) qəzeti onun ikinci prezidentlik müddətinin iflasını elan edib. Qəzetin redaktorları həmçinin Trampın Amerikaya "qızıl dövr" vermək vədlərinin uğursuzluğa düçar olduğuna əminliklərini bildiriblər.
Musavat.com
