Şəbəkədə tez-tez belə bir mem yayılır ki, orta statistik təqaüdçü qadının həmişə yastığın altında bir neçə milyon pulu olur və onu ilk rast gəldiyi fırıldaqçıya verməyə hazırdır. Təbii ki, bu daha çox zarafatdır, nəinki reallıq. Amma yaşlı nəsildən olan insanlar həqiqətən də aşağı gəlirlərə baxmayaraq, çox vaxt ciddi yığımlara sahib olurlar.
HİT.az xəbər verir ki, “YourTango” nəşrinin yazdığına görə, yaşlı insanların uşaqlıq və gənclik illərində yoxsulluq dövrlərində formalaşan vərdişləri onlara müasir gənclərə nisbətən daha sabit maliyyə vəziyyəti yaradıb.
Məqalədə həmin nəsillərə məxsus bir neçə maliyyə vərdişi göstərilir ki, “zumerlər” və bəzən mileniallar bunlara sahib deyil:
* Əşyaları təmir etmək. Məqalədə qeyd olunur ki, 60–70-ci illərdə böyüyən insanlar əşyaları atmaq əvəzinə təmir etməyə öyrəşmişdilər. Bu yanaşma xeyli vəsaitə qənaət etməyə imkan verirdi, halbuki müasir cəmiyyət daha çox “tez dəyişdirmə” mədəniyyətinə alışıb.
* Gəlir imkanlarından daha az xərcləmək. Yaşlı nəsil belə bir prinsiplə böyüyüb: qazandığından az xərcləmək lazımdır. Müasir gənclərin bir çoxu isə istədikləri həyat tərzini saxlamaq üçün ya tam sərhəddə, ya da borcla yaşayırlar.
* Yığım etmək. Məqalədə bildirilir ki, yaşlı nəsil az miqdarda olsa belə mütəmadi yığım etməyə öyrəşib. Hər maaşdan az da olsa kənara pul qoymaq “təhlükəsizlik yastığı” formalaşdırmağa kömək edib.
* Məişət bacarıqlarını öyrənmək. 60–70-ci illərdə böyüyən insanlar çox vaxt ev təmiri, tikiş və yemək hazırlığı kimi işləri özləri görürdülər. Bu isə əlavə xidmət xərclərini azaldırdı.
* Borclardan uzaq durmaq. Nəşr qeyd edir ki, Z nəsli (zumerlər) şəxsi borc baxımından ən yüksək göstəricilərə malikdir. Əksinə, 60–70-ci illərdə böyüyənləri gənc yaşdan yalnız zəruri hallarda borc almağa və imkan xaricində alış-veriş etməməyə öyrədirdilər.
* Pulun dəyərini anlamaq. Məqalədə vurğulanır ki, yaşlı nəsil uşaqlıqdan pulun ağır əmək nəticəsində qazanıldığını öyrənib. Keçmişdə uşaqlara sadəcə pul verilmirdi, əksinə onlar ev işləri və ya kiçik işlər qarşılığında qazanc əldə edirdilər.
* Alış-verişi planlaşdırmaq. Nəşrin yazdığına görə, yaşlı insanlar yalnız həqiqətən ehtiyac olan şeyləri alırdılar. Müasir onlayn alış-veriş mədəniyyəti isə impulsiv xərcləri asanlaşdırır və bu da gənclərin maliyyə vəziyyətinə mənfi təsir edir.
Samir
