Ajans.az “Corriere della Sera”-ya istinadən xəbər verir ki, Bari Apelyasiya Məhkəməsi uşağın doğum haqqında şəhadətnaməsinə iki ata və bir ananın daxil edilməsini təsdiqləyib. Qərar ölkə tarixində ilk belə presedent kimi qiymətləndirilir. Hazırda dörd yaşlı uşaq Almaniyada doğulub. Məlumata əsasən, onun bioloji atası İtaliya və Almaniya vətəndaşı olan bir şəxslə evlidir. Uşağın anası isə cütlüyün yaxın dostu olub və uşağı dünyaya gətirib. Qəzet yazır ki, doğuş zamanı həm ana, həm də bioloji ata uşağı rəsmi şəkildə tanıyıb. Daha sonra uşağın tərbiyəsi bioloji ata və onun həyat yoldaşı tərəfindən birgə davam etdirilib. Bələdiyyə əvvəlcə sənədlərin qeydiyyatından imtina edib və bunu mümkün surroqat analıqla əlaqələndirib. Lakin məhkəmə işə baxaraq belə bir müqavilənin mövcudluğunu təsdiqləməyib və bioloji ananın da ikinci ataya etiraz etmədiyini qeyd edib.
Nəticədə məhkəmə uşağın üç valideyninin rəsmi olaraq tanınması və doğum haqqında şəhadətnaməyə daxil edilməsi barədə qərar çıxarıb.
