BAKI,TurkicWorld Orxan Qədirzadə
Qəzza zolağında davam edən müharibə və blokada şəraitində Qurban bayramı bu il də dərin humanitar böhran fonunda qeyd olunur. Regionda qurbanlıq heyvanların qiymətləri rekord səviyyəyə yüksələrək 5 min dolları ötüb.
TurkicWorld xəbər verir ki, Qəzza zolağının şimal hissəsində dağıdılmış evlərin və məhv edilmiş təsərrüfatların qalıqları arasında bayram hazırlıqları bu il demək olar ki, simvolik xarakter daşıyır. Uzunmüddətli müharibə nəticəsində həm otlaq sahələri, həm də yem ehtiyatları ciddi şəkildə sıradan çıxıb.
Məlumata görə, 2023-cü ilin oktyabrından etibarən davam edən hərbi əməliyyatlar və blokada səbəbindən Qəzza zolağına canlı mal-qaranın daxil olması tamamilə dayandırılıb. Bu vəziyyət heyvandarlıq sektorunun iflic olmasına gətirib çıxarıb və qurbanlıq heyvanların kəskin qıtlığına səbəb olub.
Yerli fermerlərin bildirdiyinə görə, qurbanlıq heyvanların bir ədədi üçün qiymət 5 min dollardan da yüksəkdir. Bəzi hallarda diri çəkidə ətin kiloqramı 80–115 dollar arasında dəyişir ki, bu da əhalinin böyük hissəsinin alıcılıq imkanlarını tamamilə aşır.
Fermerlər bildirirlər ki, müharibə yalnız insan itkisi ilə deyil, həm də heyvandarlıq təsərrüfatının məhv olması ilə nəticələnib. Bir çox təsərrüfat sahibi evlərini və mal-qarasını itirib, sağ qalan az sayda heyvan isə ciddi qida qıtlığı şəraitində saxlanılır.
Otlaq sahələrinin məhv olması səbəbindən heyvandarlıqla məşğul olanlar məcburiyyət qarşısında qalaraq heyvanları humanitar yardım üçün nəzərdə tutulmuş ərzaq məhsulları ilə qidalandırırlar. Bu isə bölgədə ərzaq çatışmazlığının daha da dərinləşdiyini göstərir.
Eyni zamanda, müvəqqəti heyvandarlıq təsərrüfatlarının yaradılması da yüksək xərclər səbəbindən mümkünsüz hala gəlib. Sadə bir tövlənin tikintisi belə material qıtlığı səbəbindən təxminən 5 min dollara başa gəlir.
Yerli əhali bildirir ki, qurbanlıq ətə çıxışın demək olar ki, mümkünsüz olması Qəzza zolağında ərzaq böhranını daha da ağırlaşdırıb. Hazırda bayram ənənələrinin davam etdirilməsi əsasən xeyriyyə təşkilatlarının dəstəyi hesabına mümkün olur.
Beynəlxalq təşkilatlara isə Qəzza zolağına humanitar dəhlizlərin açılması və blokadanın yumşaldılması üçün çağırışlar edilir.
Qeyd edək ki, Qəzza zolağında 2023-cü il oktyabrın 8-dən bəri davam edən müharibə nəticəsində on minlərlə insan həyatını itirib, bölgənin infrastrukturunun böyük hissəsi isə ciddi şəkildə dağıdılıb.
